ଫୁଲବାଣୀ : କନ୍ଧମାଳ ଜିଲା ସଦର ବ୍ଲକ ଦଡ଼କି ଗ୍ରାମପଞ୍ଚୟତ ବେଣାକେରା ,ଦୁବଗଡ଼ (ହରିଜନ ସାହି),ଟ୍ରସ୍କିପଦର,ଗାଗଡପଦର ସମସ୍ତ ୱାର୍ଡର ଗ୍ରାମବାସୀ ମୌଳିକ ଅଧିକାର ବଞ୍ଚିତ ଥିବା ନେଇ ଜିଲାପାଳଙ୍କୁ ଲିଖିତ ଦାବିପତ୍ର ପ୍ରଦାନ କରିଛନ୍ତି। ଏଥିପାଇଁ ଗ୍ରାମବାସୀ ୨୦୨୪ ସାଧାରଣ ନିର୍ବାଚନରେ ଭୋଟ୍ ବର୍ଜନ କରିବା ପାଇଁ ମଧ୍ୟ ଚେତାବନୀ ଦେଇଛନ୍ତି । ନିର୍ବାଚନ ଆସିଲେ ଗାଁକୁ ଆସି ନେତାମାନେ ଅନେକ ପ୍ରତିଶ୍ରୁତି ଦିଅନ୍ତି କିନ୍ତୁ ନିର୍ବାଚନ ପରେ ସେହିସବୁ ପ୍ରତିଶ୍ରୁତି କେବଳ ପ୍ରତିଶ୍ରୁତିରେ ହିଁ ସୀମିତ ରହିଯାଏ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଦୀର୍ଘ ୬ ବର୍ଷ ହେଲାଣି ଆରଡି ରାସ୍ତାଠାରୁ ଦୁବଗଡ଼( ହରିଜନ ସାହି) ,ବେଣାକେରା ଏବଂ ଟ୍ରସ୍କିପଦର ଗ୍ରାମକୁ ସଂଯୋଗ କରୁଥିବା ରାସ୍ତା ସମସ୍ୟା ନେଇ ଗ୍ରାମବାସୀ ବାରମ୍ବାର ପ୍ରଶାସନକୁ ଅବଗତ କରାଇଥିଲେ ମଧ୍ୟ କୌଣସି ପ୍ରକାର ସମସ୍ୟାର ସମାଧାନ ହୋଇନାହିଁ ବୋଲି ମଙ୍ଗଳବାର ପୁଣି ଜିଲାପାଳଙ୍କୁ ଲିଖିତ ଅଭିଯୋଗ କରିବା ସହ ଦାବି ପୂରଣ ନ ହେଲେ ଚଳିତ ୨୦୨୪ ସାଧାରଣ ନିର୍ବାଚନରେ ଭୋଟ ବର୍ଜନ ପାଇଁ ଚେତାବନୀ ଦେଇଛନ୍ତି ଗ୍ରାମବାସୀ ।
