ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ବିନା ମଙ୍ଗଳବାର ବିଜେପି ସଂସଦୀୟ ଦଳ ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ସାଂସଦମାନେ ଅଯୋଧ୍ୟା ରାମ ଜନ୍ମଭୂମି ପ୍ରସଙ୍ଗ ଉଠାଇବା ସହ ମନ୍ଦିର କେବେ ନିର୍ମାଣ ହେବ ବୋଲି ପ୍ରଶ୍ନ କରିଥିଲେ। ସମେସ୍ତ ମନ୍ଦିର ନିର୍ମାଣ ଚାହୁଁଛନ୍ତି ସେଥିପାଇଁ ଧୈର୍ଯ୍ୟ ରଖିବାକୁ ପଡ଼ିବ ବୋଲି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ କହିଥିଲେ।
ସୂଚନା ଅନୁସାରେ ଉତ୍ତରପ୍ରଦେଶ ସାଂସଦ ରବୀନ୍ଦ୍ର କୁଶୱାହା ଏବଂ ହରିନାରାୟଣ ରାଜଭର ଏବଂ ଅନ୍ୟ କେତେକ ସାଂସଦ ରାମ ମନ୍ଦିର ନିର୍ମାଣ ପ୍ରସଙ୍ଗ ଉଠାଇଥିଲେ। ପ୍ରକାଶଯୋଗ୍ୟ ଯେ ରାଷ୍ଟ୍ରୀୟ ସ୍ୱୟଂସେବକ ସଂଘ ସମେତ କେତେକ ହିନ୍ଦୁବାଦୀ ସଂଗଠନ ରାମ ମନ୍ଦିର ଶୀଘ୍ର ନିର୍ମାଣ କରିବାକୁ ଦାବି କରିଆସୁଛନ୍ତି। ରାମ ମନ୍ଦିର ନିର୍ମାଣ ପାଇଁ ଆଇନ ଆଣିବାକୁ ଆରଏସ୍ଏସ୍ ପ୍ରମୁଖ ମୋହନ ଭାଗବତ ପ୍ରସ୍ତାବ ଦେଇଛନ୍ତି। ତେବେ ବିଜେପି ରାମ ମନ୍ଦିର ନିର୍ମାଣ ପାଇଁ ଆଇନ ଆଣିବାକୁ ମନା କରିଦେଇଛି। ୨୦୧୯ ଲୋକସଭା ନିର୍ବାଚନରେ ବିଜୟ ପାଇଁ କାର୍ଯ୍ୟ କରିବାକୁ ରାଜନାଥ ସବୁ ସାଂସଦଙ୍କୁ ପରାମର୍ଶ ଦେଇଛନ୍ତି।
