ରେଙ୍ଗାଲି: ରାଜ୍ୟ ସରକାର ଜନସାଧାରଣଙ୍କ ବିଭିନ୍ନ ସମସ୍ୟା ସମ୍ପର୍କିତ ଆପତ୍ତି ଅଭିଯୋଗର ସମାଧାନ ପାଇଁ ଜନ ଶୁଣାଣି ପୋର୍ଟାଲରେ ଆବେଦନ କରିବାକୁ ଆହ୍ବାନ ଦେଇଛନ୍ତି। ଜନ ସମସ୍ୟାର ଆଶୁ ସମାଧାନ ପାଇଁ ରାଜ୍ୟ ସରକାରଙ୍କ ଏହା ଏକ ଜନହିତକର ପଦକ୍ଷେପ ବୋଲି ଜନସାଧାରଣରେ ସ୍ବାଗତ କରାଯାଉଛି। ତେବେ ସରକାର ଖୋଲିଥିବା ଜନଶୁଣାଣି ପୋର୍ଟାଲରେ ଗତ ଦୁଇ ମାସ ହେଲା ଆପତ୍ତି ଅଭିଯୋଗ ପଞ୍ଜିକୃତ ହୋଇ ପାରୁନଥିବା ଅଭିଯୋଗ ହେଉଛି। ପୋର୍ଟାଲରେ ଲଗ୍ ଇନ୍ କଲାପରେ ଟେଲିଫୋନ୍ ନମ୍ବର ଏଣ୍ଟ୍ରି କରିବାକୁ ନିର୍ଦ୍ଦେଶ ଆସୁଛି। ଟେଲିଫୋନ ନମ୍ବର ଏଣ୍ଟ୍ରି କଲା ପରେ ଉକ୍ତ ଫୋନ୍ ନମ୍ବରକୁ ଏକ ଓଟିପି ନମ୍ବର ଆସୁଛି । ଓଟିପି ନମ୍ବରକୁ ଏଣ୍ଟର୍ କଲାପରେ ବାରମ୍ବାର ଚେଷ୍ଟା କରିବା ସତ୍ତ୍ବେ ଆଉ ଆଗକୁ ପ୍ରୋସେସିଙ୍ଗ୍ ହେଉନାହିଁ। ଯଦ୍ବାରା ଅଭିଯୋଗ ପଞ୍ଜିକୃତ ହୋଇ ପାରୁନାହିଁ। ଗତ ଦୁଇ ମାସ ହେଲା ଏଭଳି ଅଚଳାବସ୍ଥା ଦେଖା ଦେଇଥିଲେ ମଧ୍ୟ ଏହାର କୌଣସି ପ୍ରତିକାର କରାଯାଉନାହିଁ। ଫଳରେ ସରକାର ଯେଉଁ ଉଦ୍ଦେଶ୍ୟ ଓ ଲକ୍ଷ୍ୟ ରଖି ଜନ ଶୁଣାଣି ପୋର୍ଟାଲ ଖୋଲିଛନ୍ତି ତାହା ଫଳପ୍ରଦ ହେଉନାହିଁ। ଲୋକେ ଆପତ୍ତି ଅଭିଯୋଗ କରିବାରୁ ବଞ୍ଚିତ ହେଉଛନ୍ତି। ପୋର୍ଟାଲ ପରିଚାଳନା ଦାୟିତ୍ବରେ ଥିବା ଅଧିକାରୀ ଏଥିପ୍ରତି ଦୃଷ୍ଟିଦେଇ ଶୀଘ୍ର ପ୍ରତିକାର କରିବାକୁ ଦାବି ହେଉଛି।
Comments are closed.