ବେଙ୍ଗାଲୁରୁ : ତାଙ୍କ ସ୍ବପ୍ନର କ୍ରିକେଟ୍ ତାରକା ବିରାଟ କୋହଲିଙ୍କୁ ଆଲିଙ୍ଗନ କରିବାର ପ୍ରୟାସ ପ୍ରଶଂସକଙ୍କ ପାଇଁ କାଳ ପାଲଟିଛି। ଉକ୍ତ ପ୍ରଶଂସକଙ୍କୁ ନିରାପତ୍ତା କର୍ମୀ ନିସ୍ତୁକ ମାଡ଼ ମାରି ଲହୁଲୁହାଣ କରି ଦେଇଛନ୍ତି। ସୋମବାର ଏଠାରେ ପଞ୍ଜାବ କିଙ୍ଗ୍ସ ବିପକ୍ଷରେ ଆର୍ସିବି ରନ୍ର ପିଛା କରୁଥିବା ବେଳେ କୋହଲି କ୍ରିଜ୍ରେ ଥିଲେ।
ସୁରକ୍ଷା ବଳୟ ଭାଙ୍ଗି ଉକ୍ତ ପ୍ରଶଂସକ ପଡ଼ିଆ ମଧ୍ୟକୁ ଦୌଡ଼ିଯାଇ କୋହଲିଙ୍କୁ ଆଲିଙ୍ଗନ କରିଥିଲେ। ତୁରନ୍ତ କିଛି ସୁରକ୍ଷା କର୍ମୀ ଉକ୍ତ ପ୍ରଶଂସକଙ୍କୁ ଘୋଷାଡ଼ି ପଡ଼ିଆରୁ ବାହାରକୁ ନେଇ ଯାଇଥିଲେ। ଖେଳାଳିଙ୍କ ସୁରକ୍ଷାରେ ଢିଲା ଥିବାରୁ ସିନା ଉକ୍ତ ପ୍ରଶଂସକ ପଡ଼ିଆରେ ପଶିପାରିଲେ; ହେଲେ ତାଙ୍କ ଉପରେ ସମସ୍ତ ରାଗ ସୁଝାଇଲେ ସୁରକ୍ଷା କର୍ମୀ।
ତାଙ୍କୁ ପଡ଼ିଆରୁ ଷ୍ଟାଡିୟମ୍ ମଧ୍ୟରେ ଥିବା ଏକ ପତଳା ଗଳିକୁ ସେମାନେ ନେଇ ଯାଇଥିଲେ। ୩/୪ ଜଣ ବ୍ୟକ୍ତି ଉକ୍ତ ପ୍ରଶଂସକଙ୍କୁ ଯିଏ ଯେପରି ପାରିଲା; ମାରି ଚାଲିଥିଲେ। ବିଧା, ଗୋଇଠା, ମୁଥ ଉକ୍ତ ପ୍ରଶଂସକଙ୍କ ଉପରେ ବର୍ଷିଥିଲା। ଏତେ ମାଡ଼ ଖାଇ ଉକ୍ତ ପ୍ରଶଂସକ ଆଉ ଉଠି ପାରିନଥିଲେ। ଏହାର ଭିଡିଓ ଏବେ ସାମାଜିକ ଗଣମାଧ୍ୟମରେ ଘୂରିବୁଲୁଛି।
