ଦେଓଗାଁ: ମେଣ୍ଟ ହେବନି ବୋଲି ପ୍ରଚାର ହେବା ପରେ ବିଜେଡ଼ି -ବିଜେପି ଦଳର ନେତା ସୁପ୍ତ ହୋଇ ପ୍ରଚାର କରୁଥିବା ବେଳେ ଜୋଶରେ ନିର୍ବାଚନ ମୈଦାନକୁ ଓଳାଇଛି କଂଗ୍ରେସ। ବିଧାନସଭା ଓ ଲୋକ ସଭାର ଟିକଟ ଚୂଡାନ୍ତ ହୋଇ ନ ଥିଲେ ବି ବଲାଙ୍ଗୀର ବିଧାନସଭା ନିର୍ବାଚନ ମଣ୍ଡଳୀରେ ଦଳୀୟ ପତାକାର ଖୁଣ୍ଟ ପୋତା ଅଭିଯାନ ଆରମ୍ଭ କରିଛି ଦଳ। ଫଳରେ ଏବେଠୁ ନିର୍ବାଚନ ତାତି ଦେଖାଦେଲାଣି ଦେଓଗାଁ ବ୍ଳକ ଭିତରେ। ବଲାଙ୍ଗୀର ନିର୍ବାଚନ ମଣ୍ଡଳୀ କଂଗ୍ରେସ ପକ୍ଷରୁ ପଞ୍ଚାୟତ ମୁଖ୍ୟାଳୟରେ ଦଳୀୟ ପତାକାର ଶୁଭ ଖୁଣ୍ଟ ପୋତା ଦେଓଗାଁ ବ୍ଳକରୁ ଆରମ୍ଭ ହୋଇଛି। ବ୍ଳକରେ ଥିବା ୨୬ ପଞ୍ଚାୟତରେ ଏହି ଖୁଣ୍ଟ ପୋତା ହେବାକୁ ଥିବାବେଳେ ପ୍ରଥମ କରି ମୁକୁନ୍ଦପୁର ଛକ, ଅର୍ଜୁନପୁର ଛକ, ଡୁମେରପିଟା, ରାମଚନ୍ଦ୍ରପୁରରେ ପତାକା ଲଗା ଖୁଣ୍ଟ ପୋତା ହୋଇଛି। ଏହି କାର୍ଯ୍ୟକ୍ରମରେ ବ୍ଳକ କଂଗ୍ରେସ ସଭାପତି ରାମଜୀ ଚୌଧୁରୀ, ସମିତି ସଭ୍ୟ କାନ୍ତେଶ୍ୱର ପ୍ରଧାନ, ସଂକୀର୍ତ୍ତନ ବାଗ, କଂଗ୍ରେସ ଜିଲ୍ଲା ଅନୁସୂଚିତ ଜନଜାତି ସଭାପତି ମୟ ପ୍ରଧାନୀ, ଜିଲ୍ଲା ସେବା ଦଳ ଅସିତ ମିଶ୍ର, ବ୍ଳକ ଉପାଧ୍ୟକ୍ଷ ସୂର୍ୟ୍ୟକାନ୍ତି ଛତ୍ରୀଆ, ବ୍ଳକ ଅନୁସୂଚିତ ସେଲ ସଭାପତି ମନବୋଧ ହରପାଳଙ୍କ ସହ ଦଳୀୟ କର୍ମୀ ଉପସ୍ଥିତ ଥିଲେ।
Comments are closed.