କେନ୍ଦୁଝରଗଡ଼: ପାନୀୟଜଳ ଯୋଗାଣ ଦାବିରେ କେନ୍ଦୁଝର ସହର ଉପକଣ୍ଠ ଗୋବିନ୍ଦପୁର ଓ ବାମ୍ପାର ଗ୍ରାମର ଶତାଧିକ ମହିଳା ମଙ୍ଗଳବାର ସକାଳ ୭ରୁ ୧୧ଟା ପର୍ଯ୍ୟନ୍ତ କେନ୍ଦୁଝର-ପାଟଣା ରାସ୍ତାକୁ ଦୀର୍ଘ ୪ଘଣ୍ଟା ଧରି ଅବରୋଧ କରି ରଖିଥିଲେ। ଏହି ଦୁଇ ଗ୍ରାମରେ ବର୍ଷତମାମ ପାନୀୟଜଳ ସହ ଗାଧୋଇବା ପାଇଁ ଜଳାଭାବ ଥିବାନେଇ ଗ୍ରାମବାସୀଙ୍କ ପକ୍ଷରୁ ପ୍ରଶାସନ ନିକଟରେ ବାରମ୍ବାର ଗୁହାରୀ ସତ୍ତ୍ବେ କୌଣସି ସୁଫଳ ନମିଳିବାରୁ ସ୍ଥାନୀୟ ୱାର୍ଡ ସଭ୍ୟ ମନୋରଞ୍ଜନ ସାହୁଙ୍କ ନେତୃତ୍ୱରେ ଶତାଧିକ ମହିଳା ବାଧ୍ୟ ହୋଇ ରାସ୍ତା ଅବରୋଧ କରିଥିଲେ। ଖବରପାଇ ସଦର ବିଡିଓ ତିଳୋତ୍ତମା ପୃଷ୍ଟିି, ସଦର ଏସ୍ଡିପିଓ ମହେନ୍ଦ୍ରନାଥ ମୁର୍ମୁ, ସ୍ଥାନୀୟ ମଣ୍ଡୁଆ ପଞ୍ଚାୟତ ସମିତିସଭ୍ୟା କିରଣବାଳା ନାଏକ, ଗ୍ରାମ୍ୟ ପାନୀୟଜଳ ଯୋଗାଣ ବିଭାଗ ସହକାରୀ ଯନ୍ତ୍ରୀ ଓ କନିଷ୍ଠ ଯନ୍ତ୍ରୀ ପ୍ରମୁଖ ଘଟଣାସ୍ଥଳରେ ପହଞ୍ଚି ଆନ୍ଦୋଳନରତ ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଉଭୟ ଗ୍ରାମରେ ଥିବା ଅଚଳ ନଳକୂପକୁ ତୁରନ୍ତ ସଚଳ କରିବା ସହ ଆବଶ୍ରକତା ଦୃଷ୍ଟିରୁ ଦୁଇଟି ନଳକୂପ ନିର୍ମାଣ ନିମନ୍ତେ ଆନ୍ଦୋଳନରତ ଗ୍ରାମବାସୀ ଜିଦ୍ ଧରି ବସିଥିଲେ। ଦୁଇଦିନ ମଧ୍ୟରେ ଅଚଳ ନଳକୂପ ମରାମତି ସହ ନୂତନ ନଳକୂପ ନିର୍ମାଣ ନେଇ ବିଭାଗୀୟ ଯନ୍ତ୍ରୀଙ୍କ ଲିଖିତ ପ୍ରତିଶ୍ରୁତି ସହ ପାଇପଯୋଗେ ଘରକୁ ଘର ପାନୀୟଜଳ ଯୋଗାଣ ପ୍ରକଳ୍ପ ମଧ୍ୟ ଆସନ୍ତା ୨ମାସ ମଧ୍ୟରେ କାର୍ଯ୍ୟକ୍ଷମ କରାଯିବା ଲିଖିତ ପ୍ରତିଶ୍ରୁତି ପରେ ପୂର୍ବାହ୍ନ ୧୧ଟାରେ ରାସ୍ତା ଅବରୋଧ ପ୍ରତ୍ୟାହୃତ ହୋଇଥିଲା।
Comments are closed.