ଭବାନୀପାଟଣା : କୋକସରାର ଜବାହର ଉଚ୍ଚ ବିଦ୍ୟାପୀଠରେ ଦଶମ ବୋର୍ଡ ପରୀକ୍ଷା ଚାଲିଥିବାବେଳେ ଦାୟିତ୍ବରେ ଥିବା ପର୍ଯ୍ୟବେକ୍ଷକ ମୋବାଇଲ ଧରିଥିବା ଏଆଇ କ୍ୟାମେରାରେ ଜଣାପଡିଥିଲା। ଫଳରେ ସେହି ପରୀକ୍ଷାକେନ୍ଦ୍ରର ପର୍ଯ୍ୟବେକ୍ଷକଙ୍କୁ ବଦଳା ଯାଇଛି। ସ୍ଥାନୀୟ ଡ଼ିଆଇଇଟିର ବରିଷ୍ଠ ପ୍ରଶିକ୍ଷିକା ମମିତା ଦୋରା, ଗତ ମଙ୍ଗଳବାର ଦିନ ଦଶମ ବୋର୍ଡ ପରୀକ୍ଷା ପର୍ଯ୍ୟବେକ୍ଷକ ଭାବେ ଦାୟିତ୍ଵରେ ଥିଲେ। ସେହି ସମୟରେ ସେ ମୋବାଇଲ ଧରିଥିବା ଏଆଇ କ୍ୟାମେରା ଦ୍ଵାରା ବୋର୍ଡ କର୍ତୃପକ୍ଷ ଜାଣିପାରିଥିଲେ। ଫଳରେ ଆଜି ତାଙ୍କୁ ବଦଳା ଯାଇ କୋକସରା ବ୍ଲକ୍ ଶିକ୍ଷା ଅଧିକାରୀ ରଶ୍ମିତା ନେତମଙ୍କୁ ପର୍ଯ୍ୟବେକ୍ଷକ ଦାୟିତ୍ବ ଦିଆଯାଇଛି।
ସମ୍ପୃକ୍ତ ପର୍ଯ୍ୟବେକ୍ଷକଙ୍କ ବିରୁଦ୍ଧରେ ରାଜ୍ୟ ଉଚ୍ଚ ମାଧ୍ୟମିକ ବୋର୍ଡ ପକ୍ଷରୁ ପଦକ୍ଷେପ ନିଆଯିବ ବୋଲି ଜିଲ୍ଲା ଶିକ୍ଷାଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ଜଣାପଡିଛି । ତେବେ ସ୍କୁଲର ଦୁଇଟି ଫାଟକରେ “ମୋବାଇଲ୍ ନିଷିଦ୍ଧ” ବୋଲି ଲେଖାଥିବା ବେଳେ ସମ୍ପୃକ୍ତ ପର୍ଯ୍ୟବେକ୍ଷକ ସ୍କୁଲ ପରିସରରେ କିଭଳି ମୋବାଇଲ ବ୍ୟବହାର କଲେ ତାହା ବିଭିନ୍ନ ମହଲରେ ପ୍ରଶ୍ନ ସୃଷ୍ଟି କରିଛି। ତେବେ ବୋର୍ଡ ଦ୍ଵାରା ଦିଆଯାଇଥିବା ମାର୍ଗ ଦର୍ଶିକାକୁ କଡ଼ାକଡ଼ି ଭାବେ ପାଳନ ପାଇଁ ଜିଲ୍ଲା ଶିକ୍ଷା ବିଭାଗ ପକ୍ଷରୁ ସମସ୍ତ ପରୀକ୍ଷା କେନ୍ଦ୍ର ଅଧିକ୍ଷକଙ୍କୁ ନିର୍ଦ୍ଦେଶ ଦିଆ ଯାଇଛି।
