କଟକ : ମହାନଦୀ ବସ୍ ଦୁର୍ଘଟଣା ଘଟଣାରେ ଆଉ ଜଣଙ୍କର ମୃତ୍ୟୁ ଘଟିଥିବା ଜଣାପଡିଛି। ମୃତକଙ୍କ ନାମ ଉମାକାନ୍ତ ଭଟ୍ଟ। ତାଙ୍କ ଘର ପୁରୀ ଜିଲ୍ଲା କୃଷ୍ଣଶାସନପୁର ଅଞ୍ଚଳର ବୋଲି ଜଣାପଡିଛି। ବଡ଼ ମେଡ଼ିକାଲର ସେଣ୍ଟ୍ରାଲ ଆଇସିୟୁ ୧୪ ନଂ ବେଡ଼ରେ ରହି ଚିକିତ୍ସିତ ହେଉଥିବା ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଏହାକୁ ମିଶାଇ ମୃତ୍ୟୁ ସଂଖ୍ୟା ୧୨ରେ ପହଞ୍ଚିଛି।
ସୂଚନାଯୋଗ୍ୟ ଯେ, ନଭେମ୍ବର ୨୦ ମଙ୍ଗଳବାର ରାତିରେ ତାଳଚେରରୁ କଟକ ଆସୁଥିବା ‘ଜଗନ୍ନାଥ’ ନାମକ ଏକ ବସ ଜଗତପୁର ନିକଟ ମହାନଦୀ ପୋଲରୁ ଖସି ପଡିଥିଲା। ବସଟି ଏକ ମଇଁଷିକୁ ଧକ୍କା ଦେଇ ୩୦ଫୁଟ ତଳକୁ ପୋଲରୁ ଖସି ପଡିଥିଲା। ମଙ୍ଗଳବାର ରାତିରେ ଦୁର୍ଘଟଣାରେ ୧୦ଜଣ ଯାତ୍ରୀଙ୍କର ମୃତ୍ୟୁ ହୋଇଯାଇଥିଲା। ମହାନଦୀ ମଝିରେ ବସଟି ପଡିଥିବା ବେଳେ ଅନ୍ଧାର ଯୋଗୁଁ ଉଦ୍ଧାର କାର୍ଯ୍ୟରେ ଅନେକ ବାଧା ଦେଖା ଦେଇଥିଲା। ଉଦ୍ଧାରକାରୀ ଦଳ ୪ଟି ବୋଟ୍ ସାହାର୍ଯ୍ୟରେ ମହାନଦୀକୁ ଯିବା ସହ କିଛି ବାଟ ଚାଲିଚାଲି ଯାଇ ଆହତମାନଙ୍କୁ ଉଦ୍ଧାର କରି କଟକ ବଡ ମେଡିକାଲରେ ଭର୍ତ୍ତି କରିଥିଲେ। ଉଦ୍ଧାର କାର୍ଯ୍ୟରେ ଓଡ୍ରାଫ ଟିମ୍, ଅଗ୍ନିଶମ ବିଭାଗ ଓ ସ୍ଥାନୀୟ ପୁଲିସ ସାମିଲ ହୋଇଥିଲେ।
