କରାଚି : ପାକିସ୍ତାନ କ୍ରିକେଟ ଦଳର ନିର୍ଦେଶକ ଦାୟିତ୍ବରେ ଥିବା ମହମ୍ମଦ ହାଫିଜଙ୍କ ଭବିଷ୍ୟତକୁ ନେଇ ଆଶଙ୍କା ସୃଷ୍ଟି ହୋଇଛି। ଭାରତରେ ଖେଳାଯାଇଥିବା କ୍ରିକେଟ୍ ବିଶ୍ବକପ୍ରେ ପାକିସ୍ତାନ ଦଳ ଆଶାନୁରୂପ ପ୍ରଦର୍ଶନ କରିବାରେ ବିଫଳ ହେବା ପରେ ହାଫିଜଙ୍କୁ ଏହି ଦଳର ନିର୍ଦେଶକ ଭାବେ ନିଯୁକ୍ତ କରାଯାଇଥିଲା।
କିଛିଦିନ ତଳେ ନିର୍ଦେଶକ ଭାବେ ହାଫିଜଙ୍କ ସହ ଦୀର୍ଘକାଳୀନ ଚୁକ୍ତି ପାଇଁ ଅନୁମତି ପ୍ରଦାନ ନିମନ୍ତେ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ତରଫରୁ ସେଠାକାର କ୍ରୀଡ଼ା ମନ୍ତ୍ରଣାଳୟକୁ ପତ୍ର ଲେଖାଯାଇଥିଲା। ତେବେ ହାଫିଜଙ୍କ ସହ ଦୀର୍ଘକାଳୀନ ନୁହେଁ ସ୍ବଳ୍ପକାଳୀନ ଚୁକ୍ତି ସ୍ବାକ୍ଷର କରିବାକୁ ପିସିବିକୁ ପାକିସ୍ତାନ କ୍ରୀଡ଼ା ମନ୍ତ୍ରଣାଳୟ ତରଫରୁ ଅନୁମତି ପ୍ରଦାନ କରାଯାଇଥିବା ଜଣାପଡ଼ିଛି। ହାଫିଜଙ୍କ ସହ ହୋଇଥିବା ଚୁକ୍ତି ନ୍ୟୁଜିଲାଣ୍ଡ ବିପକ୍ଷ ଟି୨୦ ଶୃଙ୍ଖଳା ପରେ ସମାପ୍ତ ହେବାକୁ ଯାଉଛି।
ଏହାକୁ ଦୃଷ୍ଟିରେ ରଖି ହାଫିଜଙ୍କ ଚୁକ୍ତି କେତେ ସମୟ ପର୍ଯ୍ୟନ୍ତ ପିସିବି ବୃଦ୍ଧି କରିବ ତାହା ଉପରେ ନଜର ରହିଛି। ପାକିସ୍ତାନ ଦଳ ଅଷ୍ଟ୍ରେଲିଆ ବିପକ୍ଷରେ ସମସ୍ତ ଟେଷ୍ଟ ମ୍ୟାଚ୍ରେ ପରାସ୍ତ ହୋଇଥିବା ବେଳେ ନ୍ୟୁଜିଲାଣ୍ଡ ବିପକ୍ଷ ଟି୨୦ ଶୃଙ୍ଖଳାରେ ନୈରାଶ୍ୟଜନକ ପ୍ରଦର୍ଶନ କରିଥିବା ଯୋଗୁଁ ହାଫିଜଙ୍କ ସହ ଅନ୍ୟ ପ୍ରଶିକ୍ଷକଙ୍କ ଚୁକ୍ତି ବୃଦ୍ଧି କରିବାକୁ ପିସିବିକୁ ସତର୍କତା ଅବଲମ୍ବନ କରିବାକୁ କ୍ରୀଡ଼ା ମନ୍ତ୍ରଣାଳୟ ତରଫରୁ କୁହାଯାଇଛି।
Comments are closed.