ଡ୍ରାଇଭର ଆନ୍ଦୋଳନ ସ୍ଥଗିତ – କମିଶନର

ଭୁବନେଶ୍ୱର : ସାରା ରାଜ୍ୟରେ ଶନିବାର ଡ୍ରାଇଭରଙ୍କ ଷ୍ଟିୟରିଂ ଛାଡ ଆନ୍ଦୋଳନର ତୃତୀୟ ଦିନ ଚାଲିଥିବା ବେଳେ ଡ୍ରାଇଭରଙ୍କ ଆନ୍ଦୋଳନ ସ୍ଥଗିତ ରହିବା ନେଇ ପରିବହନ କମିଶନରଙ୍କ ପକ୍ଷରୁ ଶନିବାର ସୂଚନା ମିଳିଛି। ପରିବହନ କମିଶନର ଅମିତାଭ ଠାକୁର କହିଛନ୍ତି, ଡ୍ରାଇଭର ସଂଘ ସହ ସରକାରଙ୍କ ଆଲୋଚନା ହୋଇଛି। ସେମାନଙ୍କ ଅନେକ ଦାବି ରାଜ୍ୟ ସରକାର ପୂରଣ କରିଛନ୍ତି। ପରିବହନ ବିଭାଗକୁ ସହଯୋଗ କରି ଆନ୍ଦୋଳନ ସ୍ଥଗିତ ରଖିଛନ୍ତି। ଭାରତ ସରକାରଙ୍କ ସହ ସେମାନଙ୍କ ଆଲୋଚନା ଚାଲିଛି।
ମାତ୍ର ଡ୍ରାଇଭର ଆନ୍ଦୋଳନ ସ୍ଥଗିତ ଘୋଷଣାରେ ସେପେଟେ ଆଉ ଏକ ଟ୍ୱଇଷ୍ଟ ଦେଖାଯାଇଛି। ସ୍ଥଗିତ କଥା ଆମେ ଜାଣି ନାହୁଁ ବୋଲି ଆନ୍ଦୋଳନରତ ଡ୍ରାଇଭର କହିଛନ୍ତି। କଟକ ଗୋପାଳପୁରରେ ଆନ୍ଦୋଳନ କରୁଥିବା ଡ୍ରାଇଭର ଏଭଳି ମନ୍ତବ୍ୟ ଦେଇଛନ୍ତି। ସ୍ଥଗିତ ରହିବା ନେଇ ଆମ ରାଜ୍ୟ ସଭାପତି କିଛି କହି ନାହାଁନ୍ତି। ସଭାପତି ନକହିବା ପର୍ଯ୍ୟନ୍ତ ଆମ ଆନ୍ଦୋଳନ ଚାଲୁ ରହିବ ବୋଲି କହିଛନ୍ତି।