ସମ୍ବଲପୁର: ଗତ ଗୁରୁବାର ଦିନ ଅଇଁଠାପାଲି ଥାନା ଅର୍ନ୍ତଗତ କାଈଁଶିର ରାସ୍ତାରେ ଜଣେ ଅସହାୟ ଯୁବକ ବୁଲୁଥିବା ଦେଖି ପୁଲିସ ଏସଆଇ ନିଳାଦ୍ରୀ ବିଶ୍ୱାଳଙ୍କ ନଜରକୁ ଆସିଥିଲା। ଏହାପରେ ଯୁବକଙ୍କୁ ଉଦ୍ଧାର କରି ଶ୍ରୀ ବିଶ୍ୱାଳ ଅଇଁଠାପାଲି ଥାନାରେ ସୁରକ୍ଷିତ ରଖି ସ୍ୱେଚ୍ଛାସେବୀ ଅନୁଷ୍ଠାନ ପରିଚୟକୁ ଖବର ଦେଇଥିଲେ। ସେ ସମୟରେ ଯୁବକଙ୍କ ସ୍ୱାସ୍ଥ୍ୟାବସ୍ଥା ଠିକ ନ ଥିବାରୁ ସେ ତାଙ୍କର ନାମ ଶିବା ମାନ୍ଧାନା ବୋଲି କହିଥିବା ବେଳେ ସଠିକ ପରିଚୟ ଓ ଠିକଣା ଦେଇପାରି ନ ଥିଲେ। ଏଣୁ ପରିଚୟ ଅନୁଷ୍ଠାନର ଆଦି ନନ୍ଦ ଓ ଅନ୍ୟ ସଦସ୍ୟମାନେ ଅଇଁଠାପାଲି ଥାନାରେ ପହଞ୍ଚି ଉଦ୍ଧାର ଯୁବକଙ୍କୁ ସେବା ଚିକିତ୍ସା କରିଥିଲେ ଏବଂ ତାଙ୍କୁ ହୀରାକୁଦ ସ୍ଥିତ କଳ୍ପତରୁ ଆଶ୍ରମଠାରେ ଥଇଥାନ କରାଇଥିଲେ। ଏ ସମ୍ପର୍କରେ ଦୈନିକ ଖବରକାଗଜ ‘ସମାଜ’ରେ ଖବର ପ୍ରକାଶିତ ହେବା ପରେ ରାଇପୁର ଭାଟପଡ଼ା ନିବାସୀ ତାଙ୍କର ବଡଭାଇ ଗୌତମ ତାଙ୍କର ଭୋଟର ପରିଚୟ ପତ୍ର ଓ ଆଧାର କାର୍ଡ ନେଇ ଅଇଁଠାପାଲି ପୁଲିସ ଥାନା ସହିତ ଯୋଗାଯୋଗ କରିଥିଲେ। ସମସ୍ତ ବିଷୟ ଯାଞ୍ଚ କରାଯିବା ପରେ ଶିବାଙ୍କୁ ତାଙ୍କର ବଡଭାଇ ଗୌତମଙ୍କ ଜିମାରେ ଦିଆଯାଇଥିଲା। ଏହି ମାନବୀୟ ସେବାରେ ଆଦି ନନ୍ଦ, ଏସଆଇ ଗୋଲକ ପ୍ରଧାନ, ନିଳାଦ୍ରୀ ବିଶ୍ୱାଳ ଓ ଚୈତନ୍ୟ ନାୟକ ପ୍ରମୁଖ ସହାୟତା କରିଥିଲେ।
