ବିମାନ ବନ୍ଦରରେ ଉଡ଼ାଜାହାଜ ପଛରେ ଦୌଡ଼ିଲେ ମହିଳା

ନୂଆଦିଲ୍ଲୀ: ଇଣ୍ଡୋନେସିଆ ବିମାନବନ୍ଦରରେ ଏଭଳି ଏକ ଘଟଣା ଦେଖିବାକୁ ମିଳିଲା ଯାହା ଆଜି ପର୍ଯ୍ୟନ୍ତ ଅନ୍ୟ କୌଣସି ବିମାନ ବନ୍ଦରରେ ଘଟି ନଥିଲା। ସାମାନ୍ୟ ବିଳମ୍ବ ପାଇଁ ବିମାନରେ ଚଢି ନପାରି ଜଣେ ମହିଳାଙ୍କୁ ବିମାନ ବନ୍ଦର ମଧ୍ୟରେ ଉଡ଼ାଜାହାଜ ପଛରେ ଦୌଡ଼ୁ ଥିବା ଦୃଶ୍ୟ ସେଠାରେ ଉପସ୍ଥିତ ସୁରକ୍ଷା କର୍ମୀଙ୍କୁ ମଧ୍ୟ ଚକିତ କରି ଦେଇଥିଲା।
ସାଧାରଣତଃ ଆମେ ଦୌଡ଼ିଦୌଡ଼ି ବସ କିମ୍ବା ଟ୍ରେନ ଧରିବାର ଦୃଶ୍ୟ ଦେଖୁଥିବାବେଳେ ଦୌଡ଼ିଦୌଡ଼ି ବିମାନ ଧରିବାକୁ ଉଦ୍ୟମ କରୁଥିବା ଦୃଶ୍ୟ ବାସ୍ତବରେ ବିମାନ ବନ୍ଦର କର୍ତ୍ତୁପକ୍ଷଙ୍କୁ ବିଚଳିତ କରି ଦେଇଥିଲା। ଇଣ୍ଡୋନେସିଆର ବାଲି ବିମାନବନ୍ଦରରେ ହାନା ନାମକ ମହିଳା ଜାକର୍ତ୍ତା ପାଇଁ ବିମାନରେ ଯାତ୍ରା କରିବାର ଥିଲା। ମହିଳା ଜଣକ ଉଚିତ ସମୟରେ ବୋଡ଼ିଂ ପାଇଁ ବିମାନବନ୍ଦରରେ ଉପସ୍ଥିତ ନଥିଲେ। ତେଣୁ ବିମାନ କର୍ତ୍ତୁପକ୍ଷ ତାଙ୍କୁ ଫୋନ ମଧ୍ୟ କରିଥିଲେ। ୩ଥର ଫୋନ କରିବା ପରେ ମଧ୍ୟ ହାନା ଫୋନ ଉଠାଇ ନଥିଲେ। ତେବେ ଉଠାଣର ୧୦ମିନିଟ ପୂର୍ବରୁ ମହିଳା ସୁରକ୍ଷାବଳୟ ଭେଦ କରି ବୋଡ଼ିଂ ଗେଟ ଅତିକ୍ରମ କରି ବିମାନବନ୍ଦର ଭିତରକୁ ପ୍ରବେଶ କରିଥିଲେ। ସେତେବେଳକୁ ମହିଳାଙ୍କ ବିମାନ ରନୱେ ଆଡ଼କୁ ଅଗ୍ରସର କରିବା ଆରମ୍ଭ କରିଥିଲା। ବିମାନ ପଛରେ ମହିଳାଙ୍କୁ ଦୌଡ଼ୁ ଥିବା ଦେଖି ସୁରକ୍ଷାକର୍ମୀ ତାଙ୍କ ଅଟକାଇବାକୁ ଉଦ୍ୟମ କରିଥିଲେ। କୌଣସି ଉପାୟରେ ମହିଳାଙ୍କୁ କାବୁ କରିବା ପରେ ପରବର୍ତ୍ତୀ ବିମାନରେ ତାଙ୍କୁ ଜାକର୍ତ୍ତା ପଠା ଯାଇଥିଲା।