ମୁମ୍ବଇ: ଭିକି କୌଶଲଙ୍କ ଆଗାମୀ ଚଳଚ୍ଚିତ୍ର ‘ଦି ଗ୍ରେଟ୍ ଇଣ୍ଡିଆନ ଫ୍ୟାମିଲି’ର ଟ୍ରେଲର ରିଲିଜ୍ ହୋଇଛି। ଏଥିରେ ସେ ଭଜନ କୁମାର ଭୂମିକାରେ ଅଭିନୟ କରିଛନ୍ତି। ଗତ କିଛିଦିନ ଧରି ଲୋକେ ଏହି ଫିଲ୍ମର ଟ୍ରେଲରକୁ ଅପେକ୍ଷା କରି ରହିଥିଲେ ଏବଂ ଏବେ ଏହି ଅପେକ୍ଷାର ଅନ୍ତ ହୋଇଛି।
ତେବେ ଫିଲ୍ମର ନାଁରୁ ଜାଣି ପାରୁଥିବେ ଯେ ଏହା ଏକ ପାରିବାରିକ ଡ୍ରାମା, ଯେଉଁଥିରେ କମେଡ଼ି ମଧ୍ୟ ରହିଛି। ଏହି ଚଳଚ୍ଚିତ୍ରର କାହାଣୀ ମଧ୍ୟ ପରିବାରର ଅତୁଟ ସମ୍ପର୍କ ଉପରେ ଆଧାରିତ। ‘ଦି ଗ୍ରେଟ୍ ଇଣ୍ଡିଆନ ଫ୍ୟାମିଲି’ରେ ଭିକି କୌଶଲଙ୍କ ବିପକ୍ଷରେ ନାୟିକା ଭାବେ ନଜର ଆସିଛନ୍ତି ମାନୁଷୀ ଛିଲ୍ଲର। କିଛିଦିନ ତଳେ ନିର୍ମାତା ଏହି ଚଳଚ୍ଚିତ୍ରର ଗୀତ ‘କହ୍ନେୟା ଟ୍ବିଟର ପେ ଆଜା’ ରିଲିଜ୍ କରିଥିଲେ। ଏଥିରେ ଭିକି କୌଶଲଙ୍କ ପ୍ରଦର୍ଶନ ଓ ଗୀତକୁ ଦର୍ଶକଙ୍କ ସକରାତ୍ମକ ପ୍ରତିକ୍ରିୟା ମିଳିଥିଲା। ଏହି ଫିଲ୍ମ ମାଧ୍ୟମରେ ପ୍ରଥମ ଥର ପାଇଁ ଭିକି ଓ ମାନୁଷୀଙ୍କ ଯୋଡ଼ିକୁ ପରଦାରେ ଦେଖିବାକୁ ମିଳିବ, ଯାହାକୁ ଦେଇ ପ୍ରଶଂସକ ବେଶ୍ ଉତ୍ସାହିତ ଅଛନ୍ତି। ଏଥିରେ ଭିକି ଓ ମାନୁଷୀଙ୍କ ବ୍ୟତୀତ ୟଶପାଲ ଶର୍ମା, କୁମୁଦ ମିଶ୍ରା, ମନୋଜ ପହୱା, ସୃଷ୍ଟି ଦୀକ୍ଷିତ ପ୍ରମୁଖ କଳାକାରଙ୍କୁ ଗୁରୁତ୍ବପୂର୍ଣ୍ଣ ଭୂମିକାରେ ଦେଖିବାକୁ ମିଳିବ। ସେପ୍ଟେମ୍ବର ୨୨ରେ ପରଦାକୁ ଆସିବ ‘ଦି ଗ୍ରେଟ୍ ଇଣ୍ଡିଆନ ଫ୍ୟାମିଲି’।
