କୋକସରା : ଗଣେଶ ପୂଜା କରିବାକୁ ନେଇ ତୁମୁଳ କାଣ୍ଡ। ଯୁବକଙ୍କ ଛୁରାମାଡ଼ରେ ଗ୍ରାମର ଅନ୍ୟ ଜଣେ ଯୁବକ ଗୁରୁତର ହୋଇଥିବା ଜଣାପଡିଛି। ଗୁରୁତରଙ୍କୁ କୋକସରା ଡାକ୍ତରଖାନା ପରେ ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ପ୍ରାପ୍ତ ସୂଚନା ଅନୁଯାୟୀ କୋକସରା ଥାନା ଟେମରା ପଞ୍ଚାୟତ ସିଲିଗୁଡା ଗ୍ରାମରେ ଗଣେଶ ପୂଜା ନିମନ୍ତେ ଉକ୍ତ ଗ୍ରାମର ଯୁବଗୋଷ୍ଠୀ ଏକ ପ୍ରସ୍ତୁତି ବୈଠକ ଆୟୋଜନ କରୁଥିଲେ। ଅପରପକ୍ଷେ ନବ ଚନ୍ଦନ ନାମକ ଜଣେ ଯୁବକ ଏହାକୁ ବାରମ୍ବାର ବିରୋଧ କରି ଆସୁଥିଲା । ସେ କୁଆଡ଼େ ଗାଁରେ ପୂଜା କରାଇ ଦେବ ନାହିଁ ବୋଲି କହୁଥିଲା। ତେବେ ଏହି ଘଟଣାକୁ ନେଇ ମଙ୍ଗଳବାର ଗ୍ରାମର ଗଣେଷ ପୂଜା କମିଟି ପୂଜାରେ ବିଭ୍ରାଟ କରୁଥିବା ନେଇ କୋକସରା ଥାନାରେ ଯୁବକଙ୍କ ନାଁରେ ଅଭିଯୋଗ କରି ବାଇକରେ ଫେରିବା ସମୟରେ ତରୁଣ ମାଝୀ (୪୫)ଙ୍କୁ ତେତେଲପଡା ରାସ୍ତା ନିକଟରେ ପଛପଟୁ ଛୁରୀରେ ଅତର୍କିତ ଆକ୍ରମଣ କରିଥିଲା । ଫଳରେ ଯୁବକ ଗୁରୁତର ଆହତ ହୋଇଥିଲେ। ତାଙ୍କ ସହିତ ଥିବା ଯୁବକମାନେ ତାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ କୋକସରା ଡାକ୍ତରଖାନାରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଅବସ୍ଥା ସଙ୍କଟାପନ୍ନ ହୋଇପଡ଼ିବା ପରେ ଭବାନୀପାଟଣା ଡାକ୍ତରଖାନା ସ୍ଥାନାନ୍ତର କରାଯାଇଛି । ଭାଇକୁ ଛୁରା ମାଡ କରିବା ସହ ଘନଶ୍ୟାମ ମାଝୀଙ୍କୁ ଜାତିଆଣ ଆକ୍ଷେପ କରିଥିବା ଓ ହତ୍ୟା ଧମକ ଦେଇଥିବା ଘନଶ୍ୟାମ ମାଝୀ କୋକସରା ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ କୋକସରା ଥାନାରେ ନମ୍ବର ୨୨୨/୨୩ରେ ଏକ ମାମଲା ରୁଜୁ କରି ଅଭିଯୁକ୍ତକୁ ଅଟକ ରଖି ତଦନ୍ତ ଚାଲିଥିବା ଥାନାଧିକାରୀ ରୋନିତା ପ୍ରଧାନ କହିଛନ୍ତି ।
Popular Categories
Previous article
Next article