ମୁମ୍ବଇ: ପ୍ରେମିକ ସଚିନଙ୍କ ପାଇଁ ପାକିସ୍ତାନରୁ ଭାରତ ଆସିଥିବା ସୀମା ହାଇଦାର ଆଜି ଏକ ଜଣାଶୁଣା ନାମ ପାଲଟି ଯାଇଛନ୍ତି। ୨୨ ବର୍ଷୀୟ ସଚିନଙ୍କ ପାଇଁ ସୀମା ଡେଇଁ ଆସିବାର ତାଙ୍କ କାହାଣୀ କାହାକୁ ଅସଲି ଲାଗିଲା ତ ଆଉ କାହାକୁ ନକଲି। ତେବେ ସୀମା ହାଇଦରଙ୍କ ହୃଦୟରେ ସଚିନଙ୍କ ପାଇଁ ପ୍ରେମର ଫୁଲ କିପରି ଫୁଟିଥିଲା ତାହା ଆଗାମୀ ଚଳଚ୍ଚିତ୍ର ‘କରାଚି ଟୁ ନୋଏଡ଼ା’ରେ ଦେଖିବାକୁ ମିଳିବ। ଫିଲ୍ମର ଥିମ୍ ସଙ୍ଗ୍ ‘ଚଲ୍ ପଡ଼େ ହମ୍’ ରିଲିଜ୍ ହୋଇଯାଇଛି। ଏଥିରେ ପ୍ରୀତି ସରୋଜ କଣ୍ଠଦାନ କରିଛନ୍ତି। ଫିଲ୍ମରେ ସୀମାଙ୍କ ଭୂମିକାରେ ଅଭିନୟ କରିଛନ୍ତି ଅଭିନେତ୍ରୀ ଫରହିନ ଫଲକ। ମିଳିଥିବା ସୂଚନା ଅନୁସାରେ, ‘ଚଲ୍ ପଡ଼େ ହମ୍’କୁ ୫୦୦ରୁ ଅଧିକ ମ୍ୟୁଜିକ୍ ପ୍ଲାଟଫର୍ମରେ ରିଲିଜ୍ କରାଯାଇଛି।
ପ୍ରଯୋଜକ ଅମିତ ଜାନୀ କହିଛନ୍ତି, ଏହି ଚଳଚ୍ଚିତ୍ର ପାଇଁ ୫୦ରୁ ଊର୍ଦ୍ଧ୍ବ ଅଭିନେତା, ଅଭିନେତ୍ରୀ ଏବଂ ମଡେଲ ଅଡିସନ୍ ଦେବାକୁ ଆସିଥିଲେ। ଫରହିନ୍ ଫଲକ ଏହି ଭୂମିକା ପାଇଁ ସବୁଠୁ ଉପଯୁକ୍ତ ବୋଲି ସେ ଭାବିଥିଲେ। ଥିମ୍ ସଙ୍ଗ୍କୁ ଦିଲ୍ଲୀର ସଂସ୍କାର ଭାରତୀୟ ଅଡିଟୋରିୟମ୍ରେ ଲଞ୍ଚ୍ କରାଯାଇଛି। ଅଭିନେତ୍ରୀ ଫରହିନ୍ ଫଲକ ନିଜେ ମଧ୍ୟ ଗୀତକୁ ଏକ୍ସ(ଟ୍ୱିଟର)ରେ ଶେୟାର କରିଛନ୍ତି। ତେବେ ଅଗଷ୍ଟ ୨୭ରେ ଅମିତ ଜାନୀ ମୁମ୍ବଇରେ ଫିଲ୍ମର ପୋଷ୍ଟର ଲଞ୍ଚ୍ କରିପାରନ୍ତି ବୋଲି ସୂଚନା ମିଳିଛି।
Excited to share this new song "CHAL PADE HAIN HUM" with you guys.
A good song is not based on how many people like it, but on how many memories and feelings, you get. that’s the true beauty of music.https://t.co/FL3S7erylj#farheenfalak #seemahaider pic.twitter.com/WiA588pgiE— Farheen Falak (@FarheenFlk) August 20, 2023
କିଛି ଦିନ ପୂର୍ବରୁ ଅମିତ ଜାନୀ ଏହି ଚଳଚ୍ଚିତ୍ର ନିର୍ମାଣ କରିବାକୁ ଘୋଷଣା କରିଥିଲେ। ସୀମା ହାଇଦର ତାଙ୍କ ପ୍ରେମିକ ସଚିନ୍ ମୀନାଙ୍କ ପାଇଁ ନେପାଳ ଦେଇ ବେଆଇନ ଭାବେ ଭାରତ ଆସିଥିଲେ ଏବଂ ଗ୍ରେଟର ନୋଏଡ଼ାର ରବୁପୁରାରେ ରହିବାକୁ ଲାଗିଲେ। ସେ ତାଙ୍କ ସହ ଚାରି ପିଲାଙ୍କୁ ମଧ୍ୟ ସାଙ୍ଗରେ ଆଣିଥିଲେ। ଏ ବିଷୟରେ ଜଣାପଡ଼ିବା ପରେ ସୀମାଙ୍କୁ ଗିରଫ କରି ଜେଲକୁ ପଠାଇ ଦିଆଯାଇଥିଲା ଏବଂ ପରେ ତାଙ୍କୁ ଜାମିନ ମିଳିଥିଲା।
