ନିଲାମ ହେବନି ସନ୍ନିଙ୍କ ବଙ୍ଗଳା; କଂଗ୍ରେସର ପ୍ରଶ୍ନ- ବିଜ୍ଞପ୍ତି ପ୍ରତ୍ୟାହାର ପାଇଁ କିଏ ଉସୁକାଇଲା

ମୁମ୍ବଇ: ଅଭିନେତା ତଥା ବିଜେପି ସାଂସଦ ସନ୍ନି ଦେଓଲଙ୍କ ଜୁହୁ ବଙ୍ଗଳା ଇ-ନିଲାମ ଉପରେ ରୋକ୍‌ ଲଗାଇଛି ବ୍ୟାଙ୍କ ଅଫ୍ ବରୋଦା। ଏବେ ଏହାକୁ ନେଇ ବିବାଦ ଘନେଇବାରେ ଲାଗିଛି। କଂଗ୍ରେସ ପ୍ରଶ୍ନ କରିଛି ଯେ, ‘ବୈଷୟିକ କାରଣ’ ଦର୍ଶାଇ ନିଲାମ ନୋଟିସ୍‌ ପ୍ରତ୍ୟାହାର କରିବାକୁ ବ୍ୟାଙ୍କକୁ କିଏ ପ୍ରବର୍ତ୍ତାଇଛି।

ସୂଚନା ଅନୁସାରେ, ସନ୍ନି ଦେଓଲଙ୍କ ମୁମ୍ବଇର ଜୁହୁ ସ୍ଥିତ ବିଳାସପୂର୍ଣ୍ଣ ବଙ୍ଗଳାକୁ ବ୍ୟାଙ୍କ ଅଫ୍‌ ବରୋଦା ଦ୍ବାରା ୫୬ କୋଟି ଟଙ୍କାର ଋଣ ଆଦାୟ କରିବା ପାଇଁ ନିଲାମ କରାଯିବାର ଥିଲା। ତେବେ ସୋମବାର ବ୍ୟାଙ୍କ ଅଫ୍‌ ବରୋଦା ଏକ ନୋଟିସ୍‌ ଜାରି କରି କହିଛି, ବୈଷୟିକ କାରଣ ଯୋଗୁ ଅଜୟ ସିଂହ ଦେଓଲ ଓରଫ୍‌ ସନ୍ନି ଦେଓଲଙ୍କ ଜୁହୁ ବଙ୍ଗଳା ନିଲାମ ବିଜ୍ଞପ୍ତି ପ୍ରତ୍ୟାହାର କରି ନିଆଯାଇଛି। ଯାହାର ଅର୍ଥ ବଙ୍ଗଳା ଆଉ ନିଲାମ ହେବ ନାହିଁ।

କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି ଯେ, ଗତକାଲି ଅପରାହ୍ନରେ ଦେଶ ଜାଣିବାକୁ ପାଇଲା ଯେ, ବ୍ୟାଙ୍କ ଅଫ୍ ବରୋଦା ବିଜେପି ସାଂସଦ ସନ୍ନି ଦେଓଲଙ୍କ ଜୁହୁ ସ୍ଥିତ ବଙ୍ଗଳାକୁ ଇ-ନିଲାମ ପାଇଁ ଘୋଷଣା କରିଛି, କାରଣ ସେ ୫୬ କୋଟି ଟଙ୍କା ସୁଝିନାହାନ୍ତି। ଏହାକୁ ୨୪ ଘଣ୍ଟା ବି ପୁରିନି ଆଉ ଦେଶ ଜାଣିବାକୁ ପାଇଲା, ବ୍ୟାଙ୍କ ଅଫ୍ ବରୋଦା ବୈଷୟିକ କାରଣ ଯୋଗୁ ନିଲାମ ବିଜ୍ଞପ୍ତି ପ୍ରତ୍ୟାହାର କରିନେଇଛି। ସେ କହିଛନ୍ତି, ଆଶ୍ଚର୍ଯ୍ୟ ଲାଗୁଛି ଯେ ଏହାକୁ ପ୍ରତ୍ୟାହାର କରିବା ପାଇଁ ‘ବୈଷୟିକ କାରଣ’ ଦର୍ଶାଇବାକୁ କିଏ ଉସୁକାଇଛି ?