ଫୁଲବାଣୀ : କନ୍ଧମାଳ ଜିଲାର ବିଭିନ୍ନ ପର୍ଯ୍ୟଟନସ୍ଥଳୀକୁ ବର୍ଷ ତମାମ୍ ପର୍ଯ୍ୟଟକ ମାନେ ଆସିଥାନ୍ତି। ଏଭଳି ସ୍ଥଳେ ଦାରିଙ୍ଗବାଡ଼ି ବ୍ଳକ ଅନ୍ତର୍ଗତ ଡ଼ଡ଼ିବାଡ଼ା ଜଳ ପ୍ରପାତକୁ ମଙ୍ଗଳବାର ପଶ୍ଚିମବଙ୍ଗର ୪ ଜଣ ପର୍ଯ୍ୟଟକ ଭ୍ରମଣରେ ଆସିଥିବା ବେଳେ ସେମାନଙ୍କ ମଧ୍ୟରେ ୨ ଜଣ ପୁରୁଷ ଓ ୨ ଜଣ ମହିଳା ଥିଲେ। ତେବେ କୌଣସି ପ୍ରକାର ଅସାବଧାନତା ଯୋଗୁଁ ୪ ଜଣ ପର୍ଯ୍ୟଟକ ମାନଙ୍କ ମଧ୍ୟରୁ ୨ ଜଣ ପୁରୁଷ ଓ ଜଣେ ମହିଳାଙ୍କ ଗୋଡ଼ ଖସିଯିବାରୁ ସେମାନେ ଜଳରେ ଭାସିଯାଇଥିଲେ। ସେହି ସମୟରେ କନ୍ଧମାଳ ଜିଲା ସବୁଜବୈଦ ସଂଗଠନର ସଂପାଦକ ଓ ସମସ୍ତ କର୍ମଚାରୀ ମାନେ ସ୍ୱାଧୀନତା ଦିବସ ଅବସରରେ ଉକ୍ତ ପର୍ଯ୍ୟଟନ କ୍ଷେତ୍ରକୁ ସଫେଇ ପାଇଁ ଯାଇଥିବା ତୁରନ୍ତ ଜଳ ପ୍ରପାତ ମଧ୍ୟକୁ ତିନିଜଣ କର୍ମଚାରୀ ପ୍ରବେଶ କରି ପର୍ଯ୍ୟଟକ ମାନଙ୍କୁ ଉଦ୍ଧାର ପାଇଁ ସମସ୍ତ ପ୍ରକାର ଉଦ୍ୟମ କରି ଶେଷରେ ସଫଳ ହୋଇଥିଲେ। ପ୍ରାୟ ୨ ଘଂଟା ଅକ୍ଳାନ୍ତ ପରିଶ୍ରମ ପରେ ପର୍ଯ୍ୟଟକ ମାନେ ସୁରକ୍ଷିତ ଭାବେ ବାହାକୁ ବାହାରିଥିବାର ଜଣାଯାଇଛି। ସବୁଜ ବୈଦ ସଂଘର କର୍ମଚାରୀ ମାନଙ୍କ ଯୋଗୁଁ ସେମାନେ ପୁଣି ଥରେ ଜୀବନ ଫେରି ପାଇଥିବାରୁ ପଶ୍ଚିମବଙ୍ଗର ପର୍ଯ୍ୟଟକ ସୁଜନ ମୁଖାର୍ଜୀ ଏବଂ ଅଭିଜିତ୍ ମୁଖାର୍ଜୀ ସମସ୍ତ କର୍ମଚାରୀଙ୍କୁ ସାଧୁବାଦ ଜଣାଇଥିଲେ। ପର୍ଯ୍ୟଟକ ମାନଙ୍କର ଘର ପଶ୍ଚିମବଙ୍ଗର ସିଲିଗୁଡ଼ି ବୋଲି ପ୍ରକାଶ କରିଛନ୍ତି। ତେବେ ଗତ ୨ ଦିନ ହେଲା ଦାରିଙ୍ଗବାଡ଼ିରେ ରହିବା ସହିତ ବିଭିନ୍ନ ପର୍ଯ୍ୟଟନ ସ୍ଥଳୀ ଭ୍ରମଣ କରୁଥିଲେ। ବର୍ଷା ଯୋଗୁଁ ଜଳପ୍ରଭାତରେ ବହୁ ମାତ୍ରରେ ଜଳସ୍ତର ବୃଦ୍ଧି ପାଇଛି।
Popular Categories
Previous article
Next article