ବେଲୁଚିସ୍ତାନ: ପାକିସ୍ତାନର ବେଲୁଚିସ୍ତାନରେ ଲ୍ୟାଣ୍ଡମାଇନ ବିସ୍ଫୋରଣ ଘଟିଛି। ଏଥିରେ ୟୁନିୟନ କାଉନସିଲ ଚେୟାରମ୍ୟାନଙ୍କ ସମେତ ମୋଟ୍ ୭ ଜଣଙ୍କ ମୃତ୍ୟୁ ଘଟିଛି। ସୂଚନାନୁସାରେ, ସୋମବାର ବିଳମ୍ବିତ ରାତିରେ ବେଲୁଚିସ୍ତାନର ପଞ୍ଜଗୁର ଜିଲାରେ ଏହି ବିସ୍ଫୋରଣ ଘଟିଛି। ରିମୋଟ୍ କଣ୍ଟ୍ରୋଲ ସାହାଯ୍ୟରେ ଏକ ଗାଡ଼ିକୁ ଟାର୍ଗେଟ କରି ବିସ୍ଫୋରଣ କରାଯାଇଛି। ୟୁସି ଚେୟାରମ୍ୟାନ ଇସ୍ତିଆକ ୟାକୁବଙ୍କୁ ଟାର୍ଗେଟ କରି ଏହି ବିସ୍ଫୋରଣ କରାଯାଇଥିବା ଜଣାପଡ଼ିଛି।
ପଞ୍ଜଗୁରର ଡେପୁଟି କମିଶନର ଅମଜାଦ ସୋମ୍ରୋଙ୍କ କହିବାନୁଯାୟୀ, ବଲ୍ଗତାର ୟୁସି ଚେୟାରମ୍ୟାନ ଇସ୍ତିଆକ୍ ୟାକୁବ ଏବଂ ଅନ୍ୟ କେତେ ଜଣ ଏକ ବିବାହ ଉତ୍ସବରେ ଯୋଗଦେଇ ଫେରୁଥିଲେ। ଏହି ସମୟରେ ବିଳମ୍ୱିତ ରାତିରେ ଗାଡ଼ିକୁ ଟାର୍ଗେଟ କରାଯାଇଥିଲା। ଗାଡ଼ିଟି ବଲ୍ଗତାର ଅଞ୍ଚଳରେ ଥିବା ଏକ ବଜାରରେ ପହଞ୍ଚିବା କ୍ଷଣି ବଡ଼ ଧରଣର ବିସ୍ଫୋରଣ ଘଟିଥିଲା। ଏଥିରେ ୟୁସି ଚେୟାରମ୍ୟାନ ଇସ୍ତିଆକ୍ ୟାକୁବଙ୍କ ସମେତ ୭ ଜଣଙ୍କର ମୃତ୍ୟୁ ଘଟିଛି। ଚେୟାରମ୍ୟାନଙ୍କ ବ୍ୟତୀତ ଅନ୍ୟ ମୃତକମାନେ ହେଉଛନ୍ତି, ମହମ୍ମଦ ୟାକୁବ, ଇବ୍ରାହିମ୍, ୱାଜିଦ, ଫିଦା ହୁସେନ୍, ସର୍ଫରାଜ ଏବଂ ହାଇଦର। ଘଟଣାର ଅଧିକ ତଦନ୍ତ ଜାରି ରହିଛି।
