ବୌଦ୍ଧ : ଅନଲାଇନ ବ୍ୟବସାୟରେ ସଫଳ ହୋଇପାରିଥିବା ଫ୍ଲିପକାର୍ଟ କାମ୍ପାନୀକୁ ୪୦ ଲକ୍ଷରୁ ଊର୍ଦ୍ଧ୍ବ ଟଙ୍କାର ଚୁନା ଲଗାଇ କମ୍ପାନୀର ୩ ଜଣ କର୍ମଚାରୀ ବୌଦ୍ଧ ପୁଲିସ ଦ୍ୱାରା ଗିରଫ ହେବା ଚର୍ଚ୍ଚାର ବିଷୟ ପାଲଟିଛି। ସୂଚନା ଅନୁସାରେ, ବୌଦ୍ଧଜିଲା ପୁଲିସ କାର୍ଯ୍ୟାଳୟଠାରେ ଏସପି ରାଜ ପ୍ରସାଦଙ୍କ ଅଧ୍ୟକ୍ଷତାରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଦିଆଯାଇଥିବା ସୂଚନା ମୁତାବକ ଫ୍ଲିପକାର୍ଟ କମ୍ପାନୀର କିଛି କର୍ମଚାରୀ ସାମଗ୍ରୀ ପହଞ୍ଚାଇବା ପରେ ଗ୍ରାହକଙ୍କଠାରୁ ଆଦାୟ କରାଯାଇଥିବା ଅର୍ଥକୁ କମ୍ପାନୀ ଖାତାରେ ଜମା ନକରି ନେଇ ଫେରାର ହୋଇଯାଇଥିବା ନେଇ ବାଉଁଶୁଣୀ ଓ କଣ୍ଟାମାଳ ଥାନାରେ ଲିଖିତ ଅଭିଯୋଗ ହୋଇଥିଲା। ବାଉଁଶୁଣୀ ଥାନାରେ ଡିମିରିପାଲି ଗ୍ରାମର ଗୋପାଲ ମେହେରଙ୍କ ପକ୍ଷରୁ ହୋଇଥିବା ଅଭିଯୋଗ ଅନୁଯାୟୀ ୨୮,୪୩,୫୬୭ ଟଙ୍କା ହଡପ କରାଯାଇଛି। ସେହିପରି କଣ୍ଟାମାଳ ଥାନାରେ ବିଶ୍ୱନାଥ ପ୍ରତାପ ସାହୁଙ୍କ ପକ୍ଷରୁ ୧.୯୨,୭୨୦ ଟଙ୍କା ନେଇ କମ୍ପାନୀର ଅନ୍ୟ କର୍ମଚାରୀ ଫେରାର ହୋଇଯାଇଥିବା ନେଇ ଅଭିଯୋଗ ହୋଇଥିଲା। ଏହାବ୍ୟତୀତ ଅନଗୁଳ ଜିଲା ବାମୁର ଥାନା ଅଞ୍ଚଳରୁ ମଧ୍ୟ ଏହି କର୍ମଚାରୀମାନେ ଗ୍ରାହକଙ୍କ ନିକଟରୁ ସଂଗୃହୀତ ହୋଇଥିବା ୨.୯ ଲକ୍ଷ ଟଙ୍କା ନେଇଯାଇଥିବା ଅଭିଯୋଗ ହୋଇଛି। ଫ୍ଲିପକାର୍ଟ କମ୍ପାନୀର ଜୟପୁର ଅଫିସର ଅଧିକାରୀମାନେ ବୌଦ୍ଧ ଆସି ସବୁ ଘଟଣାର ଅନୁଧ୍ୟାନ କରିବାପରେ ସ୍ଥାନୀୟ କର୍ମଚାରୀଙ୍କ ଜରିଆରେ ଫେରାର କର୍ମଚାରୀଙ୍କ ବିରୋଧରେ ଥାନାରେ ଅଭିଯୋଗ କରାଇଥିଲେ। ଘଟଣାର ଗୁରୁତ୍ୱ ଦୃଷ୍ଟିରୁ ଏହି ମାମଲାର ତଦନ୍ତ ଖୋଦ ଏସପି ଶ୍ରୀ ପ୍ରସାଦଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅନୁଷ୍ଠିତ ହୋଇଥିଲା। ଫେରାର କର୍ମଚାରୀଙ୍କ ମୋବାଇଲ ଟ୍ରାକିଂ ଜରିଆରେ ପୁଲିସ ଘଟଣାର ପ୍ରାୟ ଏକମାସ ମଧ୍ୟରେ ୩ ଜଣ କର୍ମଚାରୀଙ୍କୁ ଗିରଫ କରିବାରେ ସଫଳ ହୋଇଛି। ଗିରଫ ହୋଇଥିବା କର୍ମଚାରୀଙ୍କ ମଧ୍ୟରେ ନୟାଗଡ଼ ଜିଲା ଦୁର୍ଗାପ୍ରସାଦ ଗ୍ରାମର ସୁନିଲ ପ୍ରିୟରଞ୍ଜନ ପାଲ(୨୫), ଖୋର୍ଦ୍ଧାଜିଲା ପାଇକ ସାହି ଅନ୍ତର୍ଗତ ପୋଡାଡିହ ଗ୍ରାମର ଆଶିଷ ରଞ୍ଜନ ପ୍ରଧାନ(୨୪) ଓ ବାଲେଶ୍ୱର ଜିଲା ଜଳେଶ୍ୱରର ବ୍ୟୋମକେଶ ଗିରି(୩୧) ରହିଥିବା ପୁଲିସ ପକ୍ଷରୁ ସୂଚନା ଦିଆଯାଇଛି। ସେମାନଙ୍କ ନିକଟରୁ ନଗଦ ୪.୫ ଲକ୍ଷ ଟଙ୍କା, ଗୋଟିଏ ଲାପଟପ୍, ୩ଟି ମୋବାଇଲ ଫୋନ ଓ ୨ଟି ମୋଟରସାଇକେଲ ଜବତ କରାଯାଇଛି। କଣ୍ଟାମାଳ ଥାନା ମାମଲା ନମ୍ବର ୧୧୧/୨୩ ଓ ବାଉଁଶୁଣୀ ଥାନା ମାମଲା ନମ୍ବର ୮୫/୨୩ ଆଧାରରେ ତିନି ଅଭିଯୁକ୍ତଙ୍କୁ ଅଦାଲତ ଚାଲାଣ କରାଯିବ ବୋଲି ପୁଲିସ ପ୍ରକାଶ କରିଛି। ତେବେ ଏହି ମାମଲାରେ ତଦନ୍ତ ଜାରି ରହିଥିବାବେଳେ ଆହୁରି ନୂତନ ତଥ୍ୟ ପଦାକୁ ଆସିବାର ସମ୍ଭାବନା ଥିବା ପୁଲିସ ପକ୍ଷରୁ ସୂଚନା ଦିଆଯାଇଛି।
Popular Categories
Previous article
Next article