ଝାରସୁଗୁଡ଼ା: ନବ ଦାସ ହତ୍ୟା ମାମଲାରେ ଅଭିଯୁକ୍ତ ଗୋପାଳ ଦାସକୁ କଟକ ଚୌଦ୍ବାର କାରାଗାରରୁ ଆଣି ଝାରସୁଗୁଡ଼ା ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ (ଜେଏମଏଫସି)ଙ୍କ ଅଦାଲତରେ ହାଜର କରାଯାଇଛି। ଆଜି ପୂର୍ବାହ୍ନରେ କ୍ରାଇମବ୍ରାଞ୍ଚ ଦଳ ସ୍ବତନ୍ତ୍ର ସୁରକ୍ଷା ଘେରା ମଧ୍ୟରେ ଗୋପାଳ ଦାସକୁ ଆଣିଥିଲେ। ସେଠାରେ କେବଳ ୧୦ ମିନିଟ ରଖାଯାଇଥିଲା। ବିଚାରପତି ଏହି ମାମଲାରେ ଗୋପାଳକୁ ପଚାରିଥିଲେ ଯେ ସେ ଆଗକୁ ଅଦାଲତରେ ମାମଲା ଲଢ଼ିବାକୁ ଚାହୁଁଛି ନା ନାହିଁ। ଗୋପାଳ ଏଥିରେ ରାଜି ହେବା ପରେ ହତ୍ୟା ଅପରାଧ ପ୍ରଥମ ଶ୍ରେଣୀ ମାଜିଷ୍ଟ୍ରେଟଙ୍କ କାର୍ଯ୍ୟ ପରିସରଭୁକ୍ତ ନ ଥିବା ହେତୁ ଉପର କୋର୍ଟକୁ ପ୍ରେରଣ କରିଥିଲେ। ପରେ ଗୋପାଳ ଦାସକୁ ଝାରସୁଗୁଡ଼ା ସ୍ଥିତି ସିଆରପିଏଫ ଦ୍ବିତୀୟ ବାଟାଲିୟନକୁ ନିଆଯାଇଥିଲା।
ଏ ସଂକ୍ରାନ୍ତରେ ରିମାଣ୍ଡ ଓକିଲ ଦୟାନିଧି ଚାନ୍ଦ କହିଛନ୍ତି ଆଜି ଗୋପାଳ ଦାସଙ୍କୁ ଜେଏମଏଫସି-୧ କୋର୍ଟରେ ହାଜର କରାଯାଇଥିଲା। ସେଠାରେ କମିଟମେଣ୍ଟ ହେବା ପରେ ଜେଏମଏଫସି ଏହି ମାମଲାକୁ ଜିଲା ଓ ଦୌରା ଜଜଙ୍କ ଅଦାଲତକୁ ସ୍ଥାନାନ୍ତର କରିଥିଲେ। ଆସନ୍ତା ତାରିଖରେ ଏହାର ଚାର୍ଜଫ୍ରେମ ହେବା ପରେ ଶୁଣାଣି ଆରମ୍ଭ ହେବ ବୋଲି କହିଛନ୍ତି।
ଜାନୁଆରୀ ୨୯ ତାରିଖ ଦିନ ତତ୍କାଳୀନ ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ ବ୍ରଜରାଜନଗରରେ ଏକ ଦଳୀୟ କାର୍ଯ୍ୟକ୍ରମରେ ଭାଗ ନେବାକୁ ଯାଉଥିବା ବେଳେ ଏଏସଆଇ ଗୋପାଳ ଦାସ ଗୁଳିମାରି ହତ୍ୟା କରିଥିବା ଅଭିଯୋଗ ହୋଇଥିଲା। କ୍ରାଇମବ୍ରାଞ୍ଚ ଏହି ମାମଲାର ତଦନ୍ତ କରୁଥିବା ବେଳେ ୩ ପର୍ଯ୍ୟାୟରେ ୧୪ଦିନ ରିମାଣ୍ଡରେ ନେଇ ଜେରା କରିଥିଲା। ରିମାଣ୍ଡ ଅବଧି ସରିବା ପରେ ଫେବୃଆରୀ ୧୪ ତାରିଖରେ ଗୋପାଳକୁ ସୁରକ୍ଷା ଦୃଷ୍ଟିରୁ କଟକ ଚୌଦ୍ବାର କାରାଗାରକୁ ସ୍ଥାନାନ୍ତର କରାଯାଇଥିଲା।
