ଡେସ୍କ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସଦ୍ୟ ସମାପ୍ତ ପଂଚାୟତ ନିର୍ବାଚନ ସମୟରେ ପ୍ରାଣ ହରାଇଥିବା ଲୋକଙ୍କ ପ୍ରତି ସମବେଦନା ଜଣାଇଛନ୍ତି। ଆଜି ଏକ ସାମ୍ବାଦିକ ସମ୍ମିଳନୀରେ ସୁଶ୍ରୀ ବାନାର୍ଜୀ କହିଛନ୍ତି ଯେ ପଂଚାୟତ ନିର୍ବାଚନ ସମୟରେ ଘଟିଥିବା ହିଂସା ଘଟଣାରେ ଦୋଷୀ ବ୍ୟକ୍ତିଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ରାଜ୍ୟ ସରକାର ପୁଲିସକୁ ଅଧିକାର ପ୍ରଦାନ କରିଛନ୍ତି।
ସୁଶ୍ରୀ ବାନାର୍ଜୀ କହିଛନ୍ତି, ୭୧ ହଜାର ବୁଥରେ ମତଦାନ ହୋଇଥିବା ବେଳେ ମାତ୍ର ୬୦ଟି ବୁଥରେ ହିଂସା ଘଟିଛି ଯେଉଁଥିରେ ୧୯ ଜଣଙ୍କ ଜୀବନ ଯାଇଛି। ମୃତକଙ୍କ ମଧ୍ୟରୁ ଅଧିକ ତୃଣମୂଳ କଂଗ୍ରେସର କର୍ମୀ ହୋଇଥିବା ସେ କହିଛନ୍ତି। ଗତ ଜୁନ ୮ରେ ନିର୍ବାଚନ ପାଇଁ ଘୋଷଣା ହେବା ଦିନ ଠାରୁ ହିଂସାତ୍ମକ କାର୍ଯ୍ୟ ବୃଦ୍ଧି ପାଇଥିଲା। ତେବେ ଏହି ହିଂସାରେ ୩୭ ଜଣ ଆକ୍ରମଣର ଶିକାର ହୋଇଥିବା ପୁଲିସ କହିଛି।
