ସିଲିଗୁଡ଼ି: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ହେଲିକପ୍ଟରକୁ ଜରୁରୀ ଅବତରଣ କରାଯାଇଛି। ମଙ୍ଗଳବାର ଖରାପ ପାଗ ଯୋଗୁ ସିଲିଗୁଡ଼ି ନିକଟ ସେଭୋକ ଏୟାରବେସ୍ରେ ହେଲିକପ୍ଟରର ଜରୁରୀକାଳୀନ ଅବତରଣ କରାଯାଇଛି।
ଅଧିକାରୀମାନେ ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ମୁଖ୍ୟମନ୍ତ୍ରୀ ମମତା ବାନାର୍ଜୀ ଜଲପାଇଗୁଡ଼ିରେ ଏକ ନିର୍ବାଚନୀ ସମାବେଶକୁ ସମ୍ବୋଧନ କରିବା ପରେ ବାଗଡୋଗ୍ରା ବିମାନବନ୍ଦରକୁ ଯାଉଥିଲେ, ସେତିକିବେଳେ ତାଙ୍କ ହେଲିକପ୍ଟରଟି ବୈକୁଣ୍ଠପୁରର ଜଙ୍ଗଲ ଉପରେ ଉଡ଼ାଣ ସମୟରେ ଖରାପ ପାଣିପାଗର ସମ୍ମୁଖୀନ ହୋଇଥିଲା। ଜଣେ ଅଧିକାରୀ କହିଛନ୍ତି, ଏଠାରେ ପ୍ରବଳ ବର୍ଷା ହେଉଛି। ଏଭଳି ପରିସ୍ଥିତିରେ ପାଇଲଟ୍ ଜରୁରୀକାଳୀନ ପରିସ୍ଥିତିରେ ହେଲିକପ୍ଟରକୁ ଅବତରଣ କରିବାକୁ ନିଷ୍ପତ୍ତି ନେଇଛନ୍ତି। ସେ କହିଛନ୍ତି, ଏହି ଘଟଣା ପରେ ନିଷ୍ପତ୍ତି ନିଆଯାଇଛି ଯେ, ମମତା ସଡ଼କ ପଥରେ ବାଗଡୋଗ୍ରା ବିମାନବନ୍ଦର ଯିବେ ଏବଂ ସେଠାରୁ କଲକତାକୁ ଉଡ଼ାଣ ଭରିବେ।
ସୂଚନାଯୋଗ୍ୟ, ପଞ୍ଚାୟତ ନିର୍ବାଚନ ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟର ଉତ୍ତର ଭାଗର ଅନେକ ଅଞ୍ଚଳ ଗସ୍ତ କରୁଛନ୍ତି। ରାଜ୍ୟରେ ପଞ୍ଚାୟତ ନିର୍ବାଚନ ପାଇଁ ଜୁଲାଇ ୮ରେ ଭୋଟ୍ ଗ୍ରହଣ ହେବ।
