ପାଟଣା: କେନ୍ଦୁଝର ଜିଲ୍ଲାର ବରିଷ୍ଠ ଆଦିବାସୀ ନେତା ତଥା ପାଟଣା ନିର୍ବାଚନ ମଣ୍ଡଳୀରୁ ସର୍ବାଧିକ ୫ ଥର ବିଧାନସଭାକୁ ନିର୍ବାଚିତ ହୋଇଥିବା ହୃଷୀକେଶ ନାଏକ ବିଜୁ ଜନତା ଦଳରୁ ଇସ୍ତଫା ଦେଇଛନ୍ତି। ସେ ୨୦୦୯ ଏବଂ ୨୦୧୪ରେ ବିଜୁ ଜନତା ଦଳ ଟିକେଟରେ ବିଧାନସଭାକୁ ଯିବା ସହ ଶେଷ ପର୍ଯ୍ୟାୟରେ ଜିଲ୍ଲା ଯୋଜନ ବୋର୍ଡ ଅଧ୍ୟକ୍ଷ ମଧ୍ୟ ହୋଇଥିଲେ। ଉଭୟ କଂଗ୍ରେସ ଓ ଅଣ କଂଗ୍ରେସ ଟିକେଟରେ ସେ ପାଟଣା ଆସନରୁ ସେ ସର୍ବାଧିକ ୫ ଥର ବିଧାୟକ ହୋଇଥିବା ବେଳେ ୨୦୦୪ରେ ଥରକ ପାଇଁ ସେ ସ୍ଵାଧୀନ ପ୍ରାର୍ଥୀ ହୋଇ ୨୦ ହଜାରରୁ ଅଧିକ ଭୋଟ ପାଇଥିଲେ ମଧ୍ୟ ପରାଜିତ ହୋଇଥିଲେ।
ଶେଷଥର ପାଇଁ ୨୦୧୯ରେ ଲୋକସଭା ଟିକେଟ ଲବିରେ ଥିବାବେଳେ ବିଜୁ ଜନତା ଦଳ ତାଙ୍କୁ ହତାଶ କରିଥିଲା। ରାଜ୍ୟସଭାକୁ ଯିବା ଆଶା ରଖିଥିବା ଶ୍ରୀ ନାଏକ ବିଜୁ ଜନତା ଦଳରେ ଆଉ ତାଙ୍କର ଭବିଷ୍ୟତ ନଥିବା ଦେଖି ବ୍ୟକ୍ତିଗତ କାରଣ ଦର୍ଶାଇ ଦଳରୁ ଇସ୍ତଫା ଦେଇଛନ୍ତି। ନିଜର ଇସ୍ତଫା ପତ୍ର ଦଳର ସଭାପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟକୁ ଗତ ୧୫ ତାରିଖରେ ରେଜିଷ୍ଟ୍ରି ଡାକରେ ସେ ପଠାଇଥିବା ସୂଚନା ଦେଇଛନ୍ତି।
