ନୂଆଦିଲ୍ଲୀ : କରୋନା ଟିକାକରଣ ନିମନ୍ତେ କୋ-ୱିନ ଆପ୍ ମାଧ୍ୟମରେ ସରକାର ସଂଗ୍ରହ କରିଥିବା ବ୍ୟକ୍ତିଗତ ତଥ୍ୟ ଏବେ ସାଧାରଣରେ ପ୍ରଘଟ ହୋଇଥିବା ଅଭିଯୋଗ ହୋଇଛି। ସୋମବାର ତୃଣମୂଳ କଂଗ୍ରେସ ସମେତ କେତେକ ବିରୋଧୀ ଦଳ ପକ୍ଷରୁ ଏପରି ଅଭିଯୋଗ ହୋଇଛି। ତେବେ ବିରୋଧୀଙ୍କ ଏପରି ଅଭିଯୋଗକୁ କେନ୍ଦ୍ର ସରକାର ଖଣ୍ଡନ କରିବା ସହିତ କୋ-ୱିନ ଆପ୍ରେ ତଥ୍ୟ ସୁରକ୍ଷିତ ରହିଥିବା କହିଛନ୍ତି। ବିରୋଧୀଙ୍କ ଅଭିଯୋଗ ଅନୁଯାୟୀ କରୋନା ଟିକା ନେବା ନିମନ୍ତେ ଦେଶବାସୀ କୋୱିନ ଆପ୍ରେ ନାମ ପଞ୍ଜୀକରଣ କରାଇଥିଲେ। ନାମ ପଞ୍ଜୀକରଣ ଲାଗି ନାଗରିକମାନେ ସେମାନଙ୍କ ଆଧାର ନମ୍ବର, ମୋବାଇଲ ନମ୍ବର, ପାସପୋର୍ଟ, ଭୋଟର ଆଇଡି ଆଦି ତଥ୍ୟ ଏହି ଆପ୍ରେ ଅପଲୋଡ କରିଥିଲେ। ଆପ୍ରେ ଅପଲୋଡ ହୋଇଥିବା ନାଗରିକଙ୍କ ଏହି ବ୍ୟକ୍ତିଗତ ତଥ୍ୟ ଏବେ ପ୍ରଘଟ ହୋଇଛି। ଏହିସବୁ ତଥ୍ୟ ଇଣ୍ଟରନେଟ୍ରେ ମାଗଣାରେ ଉପଲବ୍ଧ ହେଉଛି। କଂଗ୍ରେସର ପ୍ରମୁଖ ନେତା ପି ଚିଦମ୍ବରମ୍, ଜୟରାମ ରମେଶ, କେସି ବେଣୁଗୋପାଳ, ଟିଏମ୍ସି ନେତା ଡେରେକ ଓବ୍ରାଏନ, ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ, ରାହୁଲ ଶିବଶଙ୍କର ଆଦି ବ୍ୟକ୍ତି ବିଶେଷଙ୍କ ତଥ୍ୟ ପ୍ରଘଟ ହୋଇଥିବା ନେଇ ତୃଣମୂଳ କଂଗ୍ରେସ ଦାବି କରିଛି।
ବିରୋଧୀଙ୍କ ଏପରି ଦାବିକୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଓ ସୂଚନା ପ୍ରଯୁକ୍ତି (ଆଇଟି) ମନ୍ତ୍ରଣାଳୟ ଖଣ୍ଡନ କରିଛି। ସ୍ବାସ୍ଥ୍ୟ ମନ୍ତ୍ରଣାଳୟ କହିଛି ଯେ ବିରୋଧୀଙ୍କ ଦାବି ମିଥ୍ୟା ଓ ଭିତ୍ତିହୀନ। କୋ-ୱିନ ଆପ୍ ସମ୍ପୂର୍ଣ୍ଣ ସୁରକ୍ଷିତ। ଆପ୍ର ତଥ୍ୟକୁ ସୁରକ୍ଷିତ ରଖିବା ଲାଗି ଅନେକଗୁଡିକ ସୁରକ୍ଷା ପଦ୍ଧତି ଆପଣାଯାଇଛି। କେବଳ ଓଟିପି ମାଧ୍ୟମରେ ଆପ୍ର ତଥ୍ୟ ଉପଲବ୍ଧ ହେବ। ଅନ୍ୟପଟେ ଆଇଟି ମନ୍ତ୍ରଣାଳୟ କହିଛି ଯେ କୋ-ୱିନ ଆପ୍ର ତଥ୍ୟ ସିଧାସଳଖ ପ୍ରଘଟ ହୋଇ ନାହିଁ। ବିଭାଗୀୟ ରାଷ୍ଟ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର କହିଛନ୍ତି ଯେ ବିରୋଧୀଙ୍କ ଅଭିଯୋଗ ଉପରେ ସମୀକ୍ଷା କରାଯାଇଛି। ସମୀକ୍ଷାରୁ ଜଣାଯାଇଛି ଯେ ଆପ୍ର ତଥ୍ୟ ସିଧାସଳଖ ପ୍ରଘଟ ହୋଇ ନାହିଁ। ଟେଲିଗ୍ରାମ୍ ବୋଟ ମାଧ୍ୟମରେ ତଥ୍ୟକୁ ଚୋରି କରାଯାଇଛି। ତେବେ ହ୍ୟାକର୍ସମାନେ କହିଛନ୍ତି, ସେମାନେ ଆପ୍ରୁ ତଥ୍ୟକୁ ଚୋରି କରିଛନ୍ତି।
କୋ-ୱିନ ଆପ୍ ତଥ୍ୟ ପ୍ରଘଟ : ଅଭିଯୋଗକୁ ସରକାରଙ୍କ ଖଣ୍ଡନ
Popular Categories
Previous article
Next article