ବୌଦ୍ଧ : ବୌଦ୍ଧ ଥାନା ଅନ୍ତର୍ଗତ ଗୋଚ୍ଛାପଡା ଗ୍ରାମ ଛକ ନିକଟରୁ ପୁଲିସ ଚଢଉ କରି ୨୮୦ କିଲୋ ଗଂଜେଇ ଜବତ କରିଥିବାବେଳେ ଘଟଣାସ୍ଥଳରୁ ଅଭିଯୁକ୍ତ ଫେରାର ହୋଇଛି। ଫେରାର ଅଭିଯୁକ୍ତ ଜଣକ ଗୋଚ୍ଛାପଡା ଗ୍ରାମର ଅରବିନ୍ଦ ବାଘ (୩୫) ବୋଲି ପୁଲିସ ସୁତ୍ରରୁ ଜଣାପଡିଛି। ସୂଚନା ମତେ, ଗୋଚ୍ଛାପଡା ଗ୍ରାମ ନିକଟରେ ଜଣେ ବ୍ୟକ୍ତି ଗଂଜେଇ ଚାଲାଣ ପାଇଁ ଗାଡିକୁ ଅପେକ୍ଷା କରିଥିବା ବେଳେ ବିଶେଷ ସୁତ୍ରରୁ ଖବର ପାଇ ବୌଦ୍ଧ ପୁଲିସର ଏକ ଟିମ ଚଢାଉ କରିଥିଲା। ପୁଲିସକୁ ଦେଖି ବ୍ୟକ୍ତି ଜଣକ ଗଂଜେଇ ଛାଡି ସେଠାରୁ ଜଙ୍ଗଲ ଭିତରକୁ ଫେରାର ହୋଇ ଯାଇଥିଲା। ପୁଲିସ ଘଟଣାସ୍ଥଳରୁ ୭ଟି ଜରିବସ୍ତାରେ ଥିବା ଗଂଜେଇ ସବୁକୁ ଜବତ କରିଥିଲା। ଜବତ ଗଂଜେଇକୁ ମାଜିଷ୍ଟ୍ରେଟଙ୍କ ଉପସ୍ଥିତିରେ ଓଜନ କରିବାରୁ ତାହା ୨୮୦ କିଲୋ ବୋଲି ଜଣାପଡିଥିଲା।
