ଡେସ୍କ: ଉତ୍ତରପ୍ରଦେଶରେ ମାଫିଆ ଡନ୍ ଆତିକ ଓ ଭାଇ ଆଶ୍ରଫକୁ ସାମ୍ବାଦିକ ବେଶରେ ଆସି ସୁଟରମାନେ ହତ୍ୟା କରିଥିବା ଉତ୍ତରପ୍ରଦେଶ ପୁଲିସ କହିଛି। ଗୁଳି ଚଳାଇଥିବା ୩ ଜଣ ସୁଟର ଲୁଭଲେଶ ତିୱାରୀ, ସନ୍ନି ଓ ଅରୁଣ ମୌର୍ଯ୍ୟ ଗୁଳି ଚଳାଇବା ପରେ ଘଟଣାସ୍ଥଳରେ ଆତ୍ମ ସମର୍ପଣ କରିଥିବା ଭିଡିଓ ଫୁଟେଜରେ ଦେଖାଯାଉଥିବା ବେଳେ ସେମାନଙ୍କୁ ଗିରଫ କରିଥିବା ୟୁପି ପୁଲିସ ଦାବି କରିଛି।
ୟୁପି ପୁଲିସ କହିଛି ଯେ ସୁଟରମାନେ ସାମ୍ବାଦିକ ଭାବରେ ଆସିଥିଲେ। ଆତିକ ଚେକ୍ ଅପ୍ ପାଇଁ ପହଞ୍ଚିବା ପରେ ସାମ୍ବାଦିକ ମାନେ ତାଙ୍କୁ ଘେରି ରହିଥିଲେ ଏବଂ ଆତିକ ଓ ତାଙ୍କ ଭାଇ ଆଶ୍ରଫଙ୍କ ନିକଟତର ହୋଇଥିଲେ। ଜଣଙ୍କ ହାତରେ କ୍ୟାମେରା ଥିଲା ଏବଂ ସେ କ୍ୟାମେରାମ୍ୟାନ୍ ଭାବରେ ନିଜକୁ ପ୍ରଦର୍ଶିତ କରୁଥିଲା। ତୃତୀୟ ଜଣଙ୍କ ଉଭୟଙ୍କୁ ସାହାଯ୍ୟ କରୁଥିଲା ବୋଲି ପୁଲିସ ସୂତ୍ରରୁ ପ୍ରକାଶ।
ହସ୍ପିଟାଲରେ ପହଞ୍ଚିବା ପରେ ଆତିକକୁ ସାମ୍ବାଦିକମାନେ ମାତ୍ର ୨ଟି ପ୍ରଶ୍ନ ପଚାରୁଥିବା ବେଳେ ଜଣେ ବ୍ୟକ୍ତି ତାଙ୍କ ମୁଣ୍ଡକୁ ଗୁଳି ଚଳାଇଥିଲେ ଏବଂ ସେ ତଳେ ପଡିଯାଇଥିଲେ। ଅନ୍ୟ ଦୁଇଜଣ ଯୁବକ ମଧ୍ୟ କ୍ୟାମେରା ଏବଂ ମାଇକ୍ ଫିଙ୍ଗି ଗୁଳି ଚଳାଇବା ଆରମ୍ଭ କରିଥିଲେ।
ଏହି ଘଟଣା ପରେ ଉତ୍ତରପ୍ରଦେଶ ସରକାର ରବିବାର ଦିନ ସମସ୍ତ ଜିଲ୍ଲାରେ ଧାରା ୧୪୪ ଲାଗୁ କରିଛନ୍ତି। ଏ ସଂପର୍କରେ ୟୁପି ପୁଲିସ କହିଛି ଯେ ସମୁଦାୟ ୩ ଜଣ ଗିରଫ ହୋଇଛନ୍ତି। ୟୁପି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସମସ୍ତ ପୁଲିସ ଅଧିକାରୀମାନଙ୍କୁ ସଜାଗ ରହିବାକୁ ଏବଂ ରାଜ୍ୟରେ ଆଇନ ଶୃଙ୍ଖଳା ବଜାୟ ରଖିବାକୁ ନିର୍ଦ୍ଦେଶ ଦିଆଯାଇଛି।
