ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ତେଇସିପୁର ବଜାର ଠାରେ ଥିବା ନୟନଜୋରୀ ପୋଲର ଲୁହା ବ୍ୟାରିକେଡ଼ରେ ପିଟି ହୋଇ ଏକ ଚଳନ୍ତା କାର ପୋଲ ତଳକୁ ଓଲଟି ପଡ଼ିବା ଫଳରେ କାର୍ରେ ଥିବା ଦୁଇଜଣ ଗୁରୁତର ଭାବେ ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ପାଇଁ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ପ୍ରାଥମିକ ଚିକିତ୍ସା ପରେ ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ପୁଲିସ ଦୁର୍ଘଟଣାଗ୍ରସ୍ତ କାର୍କୁ ଜବତ କରି ତଦନ୍ତ ଚଳାଇଛି।
ପ୍ରାପ୍ତ ସୂଚନା ଅନୁଯାୟୀ, ପୁରୀରୁ ଭୁବନେଶ୍ୱର ଅଭିମୁଖେ ଯାଉଥିବା ଏକ କାର୍ କୌଣସି କାରଣରୁ ଭାରସାମ୍ୟ ହରାଇ ଶନିବାର ଅପରାହ୍ନରେ ତେଇସିପୁର ବଜାର ନିକଟରେ ଥିବା ନୟନଜୋରୀ ପୋଲର ଲୁହା ବ୍ୟାରିକେଡ଼ ସହ ଧକ୍କା ଲାଗିଥିଲା। ପରେ ଉକ୍ତ କାର୍ଟି ପୋଲ ତଳକୁ ଖସିପଡ଼ି ଓଲଟି ପଡ଼ିଥିଲା। ଫଳରେ କାର୍ରେ ଥିବା ଦୁଇଜଣ ବ୍ୟକ୍ତି ଗୁରୁତର ଭାବେ ଆହତ ହୋଇଥିଲେ। ଖବର ପାଇ ସାତଶଙ୍ଖ ଫାଣ୍ଡି ପୁଲିସ ଓ ରାଜପଥ ପେଟ୍ରୋଲିଂ ପୁଲିସ ସେଠାରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଉଭୟ ଆହତଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲେ। ଅବସ୍ଥା ଗୁରୁତର ଥିବାରୁ ପରେ ଉଭୟଙ୍କୁ ସେଠାରୁ ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଉଭୟ ଆହତଙ୍କ ଘର ଭୁବନେଶ୍ୱରର ଆଇଆର୍ସି ଭିଲେଜ ଅଞ୍ଚଳରେ ହୋଇଥିବା ସୂଚନା ମିଳିଛି।
