ସୁନାବେଡ଼ା : ସେମିଳିଗୁଡ଼ା ବ୍ଲକ ଅନ୍ତର୍ଗତ ରାଜପୁଟ ପଞ୍ଚାୟତର ପୋଡ଼ାଗଡ଼ ଘାଟରେ ଏକ ଅଭାବନୀୟ ପରିସ୍ଥିତି ଦେଖିବାକୁ ମିଳିଛି । ଗୁରୁବାର ଅପରାହ୍ଣରେ ଏକ ଦେଶୀଡଙ୍ଗା ବୁଡ଼ିଯାଇଥିବାବେଳେ ଜଣଙ୍କର ମୃତ୍ୟୁ ଏବଂ ୩ଜଣ ନିଖୋଜ ଥିବା ଜଣାପଡ଼ିଛି। ରାଜପୁଟ ପଞ୍ଚାୟତର ମୁଖିବିଡ଼େଇ ଗ୍ରାମର ସାବିତ୍ରୀ କୀର୍ସାନି, ରାମା କୀର୍ସାନି, ବବିତା ହନ୍ତାଳ,ବବିତା ଯାନୀ, ନୀଳା ନାୟକ ଏବଂ ଲମତାପୁଟ ବ୍ଲକ ଉମ୍ବେଲ ଗ୍ରାମର କମୁ ବାଲଡ଼ି,ପୂର୍ଣ୍ଣ ମୁଦୁଲି ଓ କୋରାପୁଟ ବ୍ଲକ ସୁକୁ ପଞ୍ଚାୟତ ପରଜାମୁଣ୍ଡାର ମଦନ ଖାଲପାଡ଼ିଆ ପ୍ରମୁଖ ପୋଡ଼ାଗଡ଼ ଘାଟରୁ ଦେଶୀଡଙ୍ଗାରେ ତେନ୍ତୁଳିପଡା ଗ୍ରାମକୁ ଯାଇଥିଲେ । ସେମାନେ ଚଇତି ପରବ ପାଇଁ କୁଣିଆ ଘରକୁ ଯାଇଥିଲେ। ପୁଣି ତେନ୍ତୁଳିପଡ଼ା ଘାଟରୁ ପୁନଶ୍ଚ ଦେଶୀଡଙ୍ଗାରେ ବସି ପୋଡ଼ାଗଡ଼ ଘାଟକୁ ଫେରୁଥିବାବେଳେ ନଦୀ ମଝିରେ ଡଙ୍ଗା ଭାରସାମ୍ୟ ହରାଇ ଓଲଟି ପଡ଼ିଥିଲା।
ଏହି ଘଟଣାରେ ମୁଖିବିଡ଼େଇ ଗ୍ରାମର ବବିତା ଯାନୀ, ନୀଳା ନାୟକ,ପରଜାମୁଣ୍ଡାର ମଦନ ଖାଲପାଡ଼ିଆ ଓ ଉମ୍ବେଲ ଗ୍ରାମର ପୂର୍ଣ୍ଣ ମୁଦୁଲି କୌଣସି ମତେ ଘାଟରେ ପହଞ୍ଚି ଯାଇ ଜୀବନ ରକ୍ଷା କରିଥିବା ଜଣାପଡ଼ିଛି। ସାବିତ୍ରୀ କୀର୍ସାନି, ରାମା କୀର୍ସାନି ଏବଂ ଉମ୍ବେଲ ଗ୍ରାମର କମୁ ବାଲଡି ନିଖୋଜ ଥିବାବେଳେ ସବିତା ହନ୍ତାଳଙ୍କ ମୃତଦେହ ଉଦ୍ଧାର ହୋଇଛି । ସେମିଳିଗୁଡା ଓ ନନ୍ଦପୁର ଅଗ୍ନିଶମ ବିଭାଗ କର୍ମଚାରୀମାନେ ତିନିଜଣଙ୍କୁ ଖୋଜି ବାହାର କରିବାକୁ ଆପ୍ରାଣ ଚେଷ୍ଟା ଜାରି ରଖିଛନ୍ତି। ଘଟଣାସ୍ଥଳରେ ପାଟାଙ୍ଗି ବିଧାୟକ ପିତମ ପାଢୀ, ସେମିଳିଗୁଡ଼ା ତହସିଲଦାର ଜ୍ୟୋତିରାଣୀ ରଥ, ରାଜପୁଟ ପଞ୍ଚାୟତ ସରପଞ୍ଚ ପିତାମ୍ବର କୀର୍ସାନି, ସେମିଳିଗୁଡା ଥାନାଧିକାରୀ ପ୍ରଦ୍ୟୁମ୍ନ ମହାପାତ୍ର ପ୍ରମୁଖ ଉପସ୍ଥିତ ରହି ତଦାରଖ କରୁଛନ୍ତି।
Comments are closed.