ଭୁବନେଶ୍ବର: ରାଜ୍ୟରୁ ପଶ୍ଚିମା ଝଡ଼ ପ୍ରଭାବ ପିଛା ଛାଡୁନାହିଁ। ମାର୍ଚ୍ଚ ୧୫ରୁ ଏ ପର୍ଯ୍ୟନ୍ତ ପଶ୍ଚିମା ଝଡ଼ ପ୍ରଭାବ ଲାଗି ରହିଛି। ସର୍ବାଧିକ ତାପମାତ୍ରା ୩୫ଡିଗ୍ରୀ ତଳେ ରହୁଛି। କେତେବେଳେ କେଉଁ ଅଞ୍ଚଳରେ ବର୍ଷୁଛି ତ ଆଉ କେତେବେଳେ ପବନ, କୁଆପଥର ମାଡ଼ ଓ ବର୍ଷା ହେଉଛି। ବିଜୁଳି ଘଡ଼ଘଡ଼ିରେ ଜୀବନ ହାନି ହେଉଥିବାବେଳେ ବରଫ ଖଣ୍ଡ ପରି କୁଆପଥର ମାଡ଼ରେ ପନି ପରିବା ଓ ରବି ଫସଲ ଉଜୁଡ଼ି ଯାଉଛି। ଉପକୂଳରୁ ଦକ୍ଷିଣ ଏବଂ ଉତ୍ତରରୁ ପଶ୍ଚିମ ଓଡ଼ିଶା ପର୍ଯ୍ୟନ୍ତ ସବୁଠି ଲାଗି ରହୁଛି ପଶ୍ଚିମା ଝଡ଼ ପ୍ରଭାବ। ପୁଣି ଏକ ପଶ୍ଚିମାଝଡ଼ ଆସୁଛି। ଝଡ଼ପବନ ସହିତ ବର୍ଷା ସମ୍ଭାବନା ରହିଛି। ପଶ୍ଚିମା ଝଡ଼ ପ୍ରଭାବ ୧ ତାରିଖ ପର୍ଯ୍ୟନ୍ତ ରହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି।
ଏହାର ପ୍ରଭାବରେ ଆଗାମୀ ୫ଦିନ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ବିଜୁଳି ଘଡ଼ଘଡ଼ି ସହ ବର୍ଷା, ପବନ ଓ କୁଆପଥର ମାଡ଼ ସମ୍ଭାବନା ରହିଛି। ୨୯ରେ ବିଜୁଳି ଘଡ଼ଘଡ଼ି ସହ ବର୍ଷା ହେବାକୁ ଥିବାବେଳେ ୩୦ରେ ବିଜୁଳି ଘଡ଼ଘଡ଼ି ସହ ପବନ ଘଣ୍ଟା ପ୍ରତି ୩୦ରୁ ୪୦କିମି ପର୍ଯ୍ୟନ୍ତ ବେଗରେ ବହିବ। ସେହିପରି ୩୧ରେ ବିଜୁଳି ଘଡ଼ଘଡ଼ି ସହ ଝଡ଼ ତୋଫାନ ଘଣ୍ଟା ପ୍ରତି ୪୦ରୁ ୫୦ କିମି ଏବଂ ପ୍ରବଳ ବର୍ଷାର ଆଶଙ୍କା ରହିଛି। ୩୧େର କାଳ ବୈଶାଖୀ ପ୍ରଭାବ ବଢ଼ିବ। ଉପକୂଳବର୍ତ୍ତୀ ଜିଲାଗୁଡ଼ିକରେ ବଜ୍ରପାତ ସହ ବର୍ଷା ସମ୍ଭାବନା ଥିବାବେଳେ କେନ୍ଦୁଝର, ସୁନ୍ଦରଗଡ଼, ମୟୂରଭଞ୍ଜ, ଯାଜପୁର, ଅନୁଗୋଳ, ଢେଙ୍କାନାଳ ଏବଂ କଟକରେ ବର୍ଷା ହୋଇପାରେ। ଉପରୋକ୍ତ ଜିଲାଗୁଡ଼ିକ ମଧ୍ୟରୁ କିଛି ଅଞ୍ଚଳରେ ପ୍ରବଳ ବର୍ଷା (୭ରୁ ୧୧ ସେମି) ହେବା ସମ୍ଭାବନା ରହିଛି। ପୁଣି ଏହିଦିନ ରାଜ୍ୟର ଅନେକ ସ୍ଥାନରେ ହାଲୁକା ମଧ୍ୟମ ଧରଣର ବର୍ଷାର ସମ୍ଭାବନା ରହିଛି।
