ଭୁବନେଶ୍ୱର (ସମାଜ ଡିଜିଟାଲ୍ ଡେସ୍କ) – ମାଟ୍ରିକ ପରୀକ୍ଷା ଦେଇ ଫେରୁଥିବା ବେଳେ ଜଣେ ଛାତ୍ରୀଙ୍କୁ ଅପହରଣ ଉଦ୍ୟମ ହୋଇଛି । ଦୁର୍ବୃତ୍ତଙ୍କ ଆକ୍ରମଣରେ ଏହି ଛାତ୍ରୀ ଜଣଙ୍କ ଆହତ ହୋଇଛନ୍ତି । କେନ୍ଦ୍ରାପଡା ପଟ୍ଟାମୁଣ୍ଡାଇ ବାଳିକା ଉଚ୍ଚ ବିଦ୍ୟାଳୟର ସୁମନି ନାମକ ଛାତ୍ରୀ ମନ୍ନଥନାଥ ଉଚ୍ଚ ବିଦ୍ୟାଳୟରୁ ପରୀକ୍ଷା ଦେଇ ଫେରୁଥିବା ବେଳେ ତାଙ୍କୁ ଅପହରଣ ଉଦ୍ୟମ ହୋଇଥିଲା । ଛାତ୍ରୀମାନେ ଦୁର୍ବୃତ୍ତଙ୍କ କବଳରୁ ଖସି ଆସୁଥିବା ବେଳେ ଜଣେ ତାଙ୍କୁ ବ୍ଲେଡରେ ଆକ୍ରମଣ କରିଥିଲେ ।
ପରୀକ୍ଷା ଦେଇ ଫେରୁଥିବା ବେଳେ ଦୁର୍ବୃତ୍ତମାନେ ଏକ କାରରେ ତାଙ୍କୁ ଅପହରଣ କରିବା ପାଇଁ ଚେଷ୍ଟା କରିଥିଲେ । ଛାତ୍ରୀଙ୍କୁ ଗାଡିରେ ନେଇଯାଉଥିବା ବେଳେ ସେ କାର୍ କାଚ ଭାଙ୍ଗି ଖସିଯାଇଛନ୍ତି । ପରେ ସେ ବେହୋସ ହୋଇଯାଇଥିଲେ, ତାଙ୍କ ବେକ ଓ ହାତକୁ ବ୍ଲେଡ୍ରେ କାଟି ଦେଇଥିବା ସୂଚନା ମିଳିଛି । ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛନ୍ତି । ପୁଲିସ ଏ ବିଷୟରେ କବର ପାଇ ତଦନ୍ତ ଆରମ୍ଭ କରିଛି ।
