ତିଗିରିଆ:ଅଗ୍ନିକାଣ୍ଡ ଘଟି ତିଗିରିଆ ତହସିଲ ଅନ୍ତର୍ଗତ ଜେମାଦେଇପୁର ପଞ୍ଚାୟତ ଅନ୍ତର୍ଗତ ଚିନାପାଟଣା ଗ୍ରାମରେ ଜଣେ ଚାଷୀଙ୍କର ବାଡ଼ିତଳେ ଗଦାହୋଇ ରହିଥିବା ଧାନ ଜଳିପୋଡ଼ି ପାଉଁଶ ହୋଇଯାଇଛି।
ଶନିବାର ରାତି ପ୍ରାୟ ୯ଟା ସମୟରେ ଗ୍ରାମର ଶିବ ସ୍ୱାଇଁଙ୍କ ବାଡ଼ିତଳେ ରହିଥିବା ଧାନ ଗଦାରେ ଅଗ୍ନିକାଣ୍ଡ ଘଟିଥିଲା। ଏହି ଗଦାରେ ଅମଳ ହେବାକୁ ୮ଗୁଣ୍ଠ ଜମିର ଧାନ ରହିଥିବା ବିପନ୍ନ ପରିବାର ପକ୍ଷରୁ ଜଣାପଡ଼ିଛି। ନିଆଁ ଲାଗିବା ପରେ ତିଗିରିଆ ଦମକଳ ଖବର ପାଇ ଘଟଣାସ୍ଥଳକୁ ଯାଇ ନିଆଁକୁ ଲିଭାଇଥିଲେ ମଧ୍ୟ ସେତେବେଳକୁ ସମ୍ପୂର୍ଣ୍ଣ ଧାନଗଦା ଜଳିଯାଇଥିଲା। ପ୍ରାୟ ୨୫ହଜାରରୁ ଅଧିକ ଟଙ୍କାର ଧାନ ଜଳି ଯାଇଥିବା ଅନୁମାନ କରାଯାଇଛି। ତେବେ ଅଗ୍ନିକାଣ୍ଡର କାରଣ ଜଣାପଡ଼ିନାହିଁ। ଅଗ୍ନିକାଣ୍ଡରେ କ୍ଷତିଗ୍ରସ୍ତ ଚାଷୀଙ୍କୁ ସରକାରୀ ସ୍ତରରେ କ୍ଷତିପୂରଣ ସହାୟତା ଦେବାକୁ ଦାବି ହୋଇଛି।
Comments are closed.