ସମ୍ବଲପୁର: ସମ୍ବଲପୁରର ପୁରାତନ ଖେଳାଳି ସଂଘ ତରଫରୁ ଖ୍ୟାତନାମା ଖେଳାଳି ଦିଲୀପ ଚାନ୍ଦଙ୍କ ସ୍ମୃତିରେ ଦ୍ୱିଦିବସୀୟ ପ୍ରଥମ ଦିଲ୍ଲୀପ ଚାନ୍ଦ ମୋମୋରିଆଲ ରାଜ୍ୟସ୍ତରୀୟ କବାଡି ଟୁର୍ଣ୍ଣାମେଣ୍ଟ ଆୟୋଜିତ ହୋଇଯାଇଛି। ସ୍ଥାନୀୟ ଫାଟକ ସ୍ଥିତ ଦୁର୍ଗା ପୂଜା ମଣ୍ଡପ ପଡିଆ ଠାରେ ଶନିବାର ଓ ରବିବାର ଦୁଇ ଦିନ ଧରି ଆୟୋଜିତ ହେଉଥିବା ଏହି ଟୁର୍ଣ୍ଣାମେଣ୍ଟର ଉଦଘାଟନୀ ଉତ୍ସବରେ ପୂର୍ବତନ ବିଧାୟିକା ଡା. ରାସେଶ୍ୱରୀ ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ ।
ଏହି ପ୍ରତିଯୋଗିତାରେ ରାଜ୍ୟର ୧୭ଟି କବାଡି ଦଳ ଅଂଶ ଗ୍ରହଣ କରୁଛନ୍ତି । ସମ୍ବଲପୁର ତଥା ପଶ୍ଚିମ ଓଡିଶାରେ କବାଡି ଖେଳକୁ ଅଧିକ ଲୋକପ୍ରିୟ ଓ ପ୍ରୋତ୍ସାହିତ କରିବା ପାଇଁ ଆୟୋଜିତ ଏହି ପ୍ରତିଯୋଗିତାର ଉଦଘାଟନୀ ଉତ୍ସବରେ ସମ୍ମାନୀତ ଅତିଥି ରୁପେ ପୂର୍ବତନ ଉପ ନଗରପାଳ ସିଦ୍ଧାର୍ଥ ସାହା, ପୂର୍ବତନ ବିଜେଡି ଜିଲା ସଭାପତି ଡ. ପ୍ରମୋଦ ରଥ ଓ ଜିଲା କ୍ରିଡା ସଂଘର ସାଧାରଣ ସମ୍ପାଦକ ସୁନୀଲ ସାହୁ ଯୋଗ ଦେଇଥିଲେ । ପ୍ରଥମ ଦିବସରେ ୧୧ଟି ଦଳ ମଧ୍ୟରେ ୧୦ଟି ପ୍ରତିଯୋଗିତା ଆୟୋଜିତ ହୋଇଥିଲା । ରବିବାର ଏହି ପ୍ରତିଯୋଗିତାର ଫାଇନାଲ ମ୍ୟାଚ ଅନୁଷ୍ଠିତ ହେବ ବୋଲି ଆୟୋଜକ ମାନେ ସୂଚନା ଦେଇଛନ୍ତି ।
