ଫୁଲବାଣୀ : କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ କାସିନି ପଦର ପଞ୍ଚାୟତ ସାଶି ପଦର ଗାଁର ୬୫ ବର୍ଷୀୟ ବୃଦ୍ଧ ଭୁବନେଶ୍ୱର ବୁଲିବାକୁ ଯାଇ ନିଖୋଜ ହୋଇଥିବା ସୂଚନା ମିଳିଛି । ସୂଚନା ଅନୁସାରେ ଗତ ୧୨ ତାରିଖରେ କାଶିନି ପଦର ଉନ୍ନୀତ ଉଚ୍ଚ ବିଦ୍ୟାଳୟର ୩୮ଜଣ ଛାତ୍ର ଛାତ୍ରୀ, ଅଭିଭାବକ ବିଦ୍ୟାଳୟର ଶିକ୍ଷକ ମାନେ ମିଶି ଶିକ୍ଷଣ ସମ୍ବନ୍ଧୀୟ ପରିଦର୍ଶନରେ ଭୁବନେଶ୍ୱର ଯାଇଥିଲେ। ୧୩ ତାରିଖରେ ଭୁବନେଶ୍ଵର ପହଞ୍ଚିବା ପରେ ସକାଳେ ନନ୍ଦନ କାନନ, ଖଣ୍ଡଗିରି ଓ ଅନ୍ୟାନ୍ୟ ଅଞ୍ଚଳ ବୁଲି ସାରିବା ପରେ ଇସ୍କନ ମନ୍ଦିରରେ ସନ୍ଧ୍ୟା ସମୟରେ ପହଞ୍ଚିଥିଲେ। ସନ୍ଧ୍ୟା ସମୟରେ ମନ୍ଦିର ଦର୍ଶନ ସାରି ମନ୍ଦିରରୁ ସମସ୍ତେ ବସ ପାଖକୁ ଫେରିଥିବା ବେଳେ ମାନ୍ଦ୍ରୁ ମାଝୀ ଓ ତାଙ୍କ ସ୍ତ୍ରୀ ବସ ପାଖକୁ ଆସିଥିଲେ କିନ୍ତୁ ଗହଳି ଯୋଗୁଁ ମାନ୍ଦ୍ରୁ ମାଝୀ ସେଠାରୁ କେଉଁ ଆଡ଼େ ନିଖୋଜ ହୋଇ ଯାଇଥିଲେ। ସେ ଭୁବନେଶ୍ୱର କେବେ ଯାଇନଥିବା ବେଳେ ରାସ୍ତା ଭୁଲି ବସ୍ ପାଖକୁ ଫେରି ପାରିନଥିଲେ। ବିଦ୍ୟାଳୟରୁ ଯାଇଥିବା ଶିକ୍ଷକ ମାନେ ଓ କିଛି ଅଭିଭାବକ ମିଶି ରାତି ପର୍ଯ୍ୟନ୍ତ ଖୋଜା ଖୋଜି କରିଥିଲେ ମଧ୍ୟ କୌଣସି ସନ୍ଧାନ ମିଳିନଥିଲା। ଏହା ପରେ କିଛି ଶିକ୍ଷକ ସେଠାରେ ରହି ଖୋଜା ଖୋଜି କରିଥିଲେ। ତେବେ ଅନ୍ୟ ମାନେ ଛାତ୍ର-ଛାତ୍ରୀ ମାନଙ୍କୁ ନେଇ ଫେରିଥିବା ବେଳେ ପର ଦିନ ପୁଣି ନିରୁଦ୍ଧିଷ୍ଟ ବ୍ୟକ୍ତିଙ୍କ ପରିବାର ଓ ଗାଁର କିଛି ଲୋକେ ଭୁବନେଶ୍ୱର ଯାଇ ଖୋଜା ଖୋଜି କରିଥିଲେ ମଧ୍ୟ କୌଣସି ସନ୍ଧାନ ନ ପାଇବାରୁ ବାଧ୍ୟ ହୋଇ ଭୁବନେଶ୍ୱର ନୟାପଲ୍ଲୀ ଥାନାରେ ଲିଖିତ ଅଭିଯୋଗ କରିଛନ୍ତି। ନୟାପଲ୍ଲୀ ଥାନା ତରଫରୁ ସିସିଟିଭି ଫୁଟେଜ ଚେକ୍ କଲାପରେ ବ୍ୟକ୍ତି ଜଣକ ସେଠାରୁ ବାହାରୁଥିବା ଓ ଏପଟେ ସେପଟେ ହେଉଥିବା ଦେଖିବାକୁ ମିଳିଥିବା ବେଳେ ଦୀର୍ଘ ୬ ଦିନରୁ ଅଧିକ ସମୟ ବିତିଯାଇଥିଲେ ମଧ୍ୟ କୌଣସି ସନ୍ଧାନ ମିଳିନଥିବାରୁ ପରିବାର ଚିନ୍ତାରେ ରହିଛନ୍ତି। ଏବେବି ପରିବାରର କିଛି ସଦସ୍ୟ ଭୁବନେଶ୍ୱରରେ ରହି ଖୋଜା ଖୋଜି କରୁଥିବା ବେଳେ ଶୀଘ୍ର ମିଳିବା ନେଇ ଆଶା ରଖିଛନ୍ତି। ଅନ୍ୟ ପଟେ କୌଣସି ସହୃଦୟ ବ୍ୟକ୍ତି ତାଙ୍କୁ ଦେଖିଲେ ଫିରିଙ୍ଗିଆ ଥାନା କିମ୍ବା ନୟାପଲ୍ଲୀ ଥାନରେ ଯୋଗାଯୋଗ କରିବାକୁ ନିବେଦନ କରିଛନ୍ତି।
Comments are closed.