ରେଙ୍ଗାଲିକ୍ୟାମ୍ପ: ଅତାବିରା ଏନ୍.ଏ.ସି ସ୍ଥିତ ବୈମାନ ଟିକ୍ରାରେ ନିର୍ମାଣ ହେଉଥିବା ଅଢେଇ କୋଟି ଟଙ୍କାର ବିଜୁ ସେତୁର ନିମ୍ନ ମନର କାମକୁ ନେଇ ଅଞ୍ଚଳରେ ଅସନ୍ତୋଷ ଦେଖାଦେଇଛି । ଦୀର୍ଘ ଦିନ ଧରି ଏହି ବିଜୁ ସେତୁର ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ଜିଲ୍ଲାପାଳଙ୍କ ତାଗିଦ ସତ୍ତ୍ଵେ ମଧ୍ୟ ଏହା ଆଜି ଯାଏଁ ସମ୍ପୂର୍ଣ୍ଣ ହୋଇନାହିଁ । ଅନ୍ୟ ପକ୍ଷରେ ଏହାର ନିମ୍ନ ମନର କାର୍ଯ୍ୟକୁ ନେଇ ବାରମ୍ବାର ଗଣମାଧ୍ୟମରେ ସମାଲୋଚନା ମୂଳକ ଖବର ପ୍ରକାଶ ପାଇଥିଲେ ମଧ୍ୟ କୌଣସି କଥାକୁ ଦୃଷ୍ଟି ନଦେଇ ମନମୁଖି କାମ କରୁଥିବା ନେଇ ପ୍ରଶ୍ନବାଚୀ ସୃଷ୍ଟି ହେଇଛି । ଅପରପକ୍ଷରେ ଅତାବିରା ବାବେବିରା ରାସ୍ତା ନିର୍ମାଣ ପାଇଁ ୫ କିମିକୁ ୪ କୋଟିରୁ ଉର୍ଦ୍ଧ୍ବ ଟଙ୍କା ବ୍ୟୟ ଅଟକଳରେ କରାଯାଉଛି ।
ହେଲେ ଏହି ରାସ୍ତାଟିକୁ ମଧ୍ୟ ଗୋଟିଏ ପଟେ ରାସ୍ତା ହୋଇଥିବା ବେଳେ, ଅନ୍ୟ ପାର୍ଶ୍ୱଟି ଦୀର୍ଘ ତିନି ମାସ ହେଲା ପଡ଼ିରହିଛି । ଯାହା ଫଳରେ ବିଭିନ୍ନ ଦୁର୍ଘଟଣା ପ୍ରତିଦିନ ଘଟୁଛି । ଏ ନେଇ ଯନ୍ତ୍ରୀ ସୁଶିଲ କୁମାର ଚୌଧୁରୀଙ୍କୁ ଯୋଗାଯୋଗ କରିଥିଲେ ମଧ୍ୟ ଯନ୍ତ୍ରୀ ଲୋକଙ୍କ କଥାକୁ ଖାତିର ନକରି ସେମାନଙ୍କ କଥାକୁ ଅଣଦେଖା କରିବାର ପ୍ରୟାସ କରିଥିଲେ ବୋଲି ଜଣାପଡ଼ିଛି । ଲୋକମାନେ ଏହି ରାସ୍ତାଦେଇ ଯାତାୟାତ କରୁଥିବାରୁ ନାନା ଅସୁବିଧାରେ ପଡ଼ୁଛନ୍ତି । ସେପ୍ଟେମ୍ବର ସୁଦ୍ଧା ଏହି କାମ ସମ୍ପୂର୍ଣ୍ଣ କରିବା ପାଇଁ ସମୟ ଧାର୍ଯ୍ୟ ରହିଥିଲା ,କିନ୍ତୁ ନଭେମ୍ବର ସାରିବାକୁ ବସିଲାଣି । ହେଲେ ଏହାର କାମ ସମ୍ପୂର୍ଣ୍ଣ ହୋଇପାରିନାହିଁ । ତେବେ ଆଉ କେତେଦିନ ପରେ ଏହି ସେତୁ କାମ ଶେଷ ହେବ ଜନ ସାଧାରଣ ଅପେକ୍ଷାରେ ରହିଛନ୍ତି ।
