ଭୁବନେଶ୍ୱର: ସାଇବର କ୍ରାଇମ ଓ ଅର୍ଥନୈତିକ ଅପରାଧ ଶାଖାକୁ ସଫଳତା ମିଳିଛି । ଏକ ଠକାମୀ ଅଭିଯୋଗର ତଦନ୍ତ କରି ୩ଜଣ ଅଭିଯୁକ୍ତଙ୍କୁ ଗିରଫ କରିବା ସହ କୋର୍ଟ ଚାଲାଣ କରାଯାଇଛି । ସୂଚନା ଅନୁଯାୟୀ, ୧୨.୧୧.୨୦୨୨ରିଖରେ ଅଭିଯୋଗକାରୀ ଶ୍ରୀ ବିକାଶ ସେହେଗଲଙ୍କ ଅଭିଯୋଗକ୍ରମେ ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନାରେ ଏକ ମାମଲା ରୁଜୁ କରାଯାଇଥିଲା । ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ପୁଲିସ ମାମଲାର ତଦନ୍ତ କରି ୩ଜଣ ଅଭିଯୁକ୍ତ ଗିରଫ କରି କୋର୍ଟ ଚାଲାଣ କରିଛନ୍ତି ।
ଘଟଣାଦିନ ମଧ୍ୟାହ୍ନରେ ଅଭିଯୋଗକାରୀଙ୍କ ମୋବାଇଲ ଫୋନକୁ ଅଜଣା ନମ୍ବରରୁ ଏକ କଲ ଆସିଥିଲା । କଲ କରିଥିବା ବ୍ୟକ୍ତି ଜଣକ ନିଜକୁ ମନ୍ତ୍ରୀଙ୍କ ପିଏ ବୋଲି ପରିଚୟ ଦେଇଥିଲେ । କଳାହାଣ୍ଡି ଜିଲ୍ଲାରେ ମନ୍ତ୍ରୀ ଏକ ଯଜ୍ଞର ଆୟୋଜନ କରିଥିବା ଏବଂ ଜରୁରୀ ଦରକାର ଥିବା କହି କିଛି ଟଙ୍କା ପଠାଇବା ଲାଗି ଅନୁରୋଧ କରିଥିଲେ । ତାହା ସହିତ ଯୋଗାଯୋଗ ନିମନ୍ତେ ଅନ୍ୟ ଏକ ଫୋନ ନମ୍ବର ଦେଇଥିଲେ । ଯେଉଁ ନମ୍ବରକୁ ଜଣେ ପୂଜକ ବ୍ୟବହାର କରୁଥିଲେ । ଅଭିଯୋଗକାରୀ ଜଣେ ବ୍ୟବସାୟୀ ହୋଇଥିବା ସ୍ଥଳେ ଜଣେ ପରୋପକାରୀ ବ୍ୟକ୍ତି ଭାବେ ଜଣାଶୁଣା ଅଟନ୍ତି ।
ଏଣୁ ସେ ବିଶ୍ଵାସ ଓ ଭରସା କରି ୮୨୮୦୦୯୦୯୭୭୭ ନମ୍ବରରେ ୩୧,୫୦୦ଟଙ୍କା ଫୋନ-ପେ କରିଥିଲେ । କିଛି ସମୟ ପରେ ସେ ଉପରୋକ୍ତ ନମ୍ବରରେ ଯୋଗାଯୋଗ କରିବାରୁ ତାହା ବନ୍ଦଥିବା ଜଣାପଡିଥିଲା । ଏହି ଘଟଣାରେ ଅଭିଯୋଗକାରୀ ଜଣକ ଠକାମୀର ଶିକାର ହୋଇଥିବା ଜାଣିପାରି ଥାନାରେ ଅଭିଯୋଗ କରିଥିଲେ । ଘଟଣା ଅଭିଯୋଗ ପରେ ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ପୁଲିସ ମାମଲା ରୁଜୁ କରିବା ସହିତ ମାମଲାରେ ସମ୍ପୃକ୍ତ ଥିବା ୩ଜଣ ଅଭିଯୁକ୍ତଙ୍କୁ ତୁରନ୍ତ ଗିରଫ କରିଥିଲେ । ଛାନଭିନ ସମୟରେ ପୁଲିସ ସେମାନଙ୍କ ନିକଟରୁ ୬ଟି ମୋବାଇଲ ଫୋନ ଏବଂ ୫୦,୦୦୦ଟଙ୍କା ଜବତ କରିଥିଲେ । ପଚରା ଉଚରା ସମୟରେ ଅଭିଯୁକ୍ତ ମାନେ ନିଜ ଦୋଷ ସ୍ଵୀକାର କରିଥିଲେ । ତଦନ୍ତ ପରେ ଆଜି ସେମାନଙ୍କୁ କୋର୍ଟ ଚାଲାଣ କରାଯାଇଛି ।
