ନୂଆଦିଲ୍ଲୀ : ସିବିଆଇ ନିର୍ଦ୍ଦେଶକ ଆଲୋକ ବର୍ମାଙ୍କୁ ସରକାର ବୁଧବାରଠାରୁ ଛୁଟିରେ ପଠାଇ ଦେଇଥିବା ବେଳେ ଗୁରବାର ତାଙ୍କ ଘର ସମ୍ମୁଖରେ ବଡ଼ ଧରଣର ହଙ୍ଗାମା ହୋଇଯାଇଛି। ଦିଲ୍ଲୀ ସ୍ଥିତ ତାଙ୍କ ବାସଭବନ ସମ୍ମୁଖରେ ସନ୍ଦେହଜନକ ଭାବେ ବୁଲୁଥିବା ୪ ଜଣ ବ୍ୟକ୍ତିଙ୍କୁ ପୁଲିସ ଅଟକ ରଖିଛି।
ସୂଚନା ଅନୁସାରେ, ଆଜି ସକାଳ ୭.୪୫ ସମୟରେ ୪ ଜଣ ବ୍ୟକ୍ତି ବର୍ମାଙ୍କ ଘର ଉପରେ ନଜର ରଖୁଥିବା ଲକ୍ଷ୍ୟ କରାଯାଇ ଥିଲା। ଏହାପରେ ବର୍ମାଙ୍କ ପିଏସ୍ଓ ସେମାନଙ୍କୁ ଅଟକ ରଖିବା ସହ ତାଙ୍କ ପାଖରୁ ଗୁଇନ୍ଦା ବିଭାଗର ଆଇ କାର୍ଡ଼ ମଧ୍ୟ ଜବତ କରିଛି। ମିଳିଥିବା ଖବର ଅନୁସାରେ, ଏହି ୪ଜଣଙ୍କ ନାମ ପ୍ରଶାନ୍ତ କୁମାର, ଭିନୀତ କୁମାର ଗୁପ୍ତା, ଅଜୟ କୁମାର ଓ ଧରଜ କୁମାର ସିଂହ ବୋଲି ଜଣାପଡ଼ିଛି। ତେବେ ଏହି ୪ଜଣ ନିଜକୁ ଇଣ୍ଟେଲିଜେନ୍ସ ବ୍ୟୁରୋ(ଆଇବି) ଅଧିକାରୀ ବୋଲି ପରିଚୟ ଦେଇଛନ୍ତି ଓ ଆଧାର ସମେତ କିଛି ପ୍ରମାଣ ପତ୍ର ମଧ୍ୟ ପୁଲିସକୁ ଦେଇଛନ୍ତି। ବର୍ତ୍ତମାନ ପୁଲିସ ଏସମସ୍ତ ପ୍ରମାଣ ପତ୍ରର ଜାଞ୍ଚ କରିବା ସହ ପଚରାଉଚରା ଜାରି ରଖିଛି।
#WATCH: Earlier visuals of two of the four people (who were seen outside the residence of #AlokVerma) being taken for questioning. #CBI #Delhi pic.twitter.com/2KnqNfrnH0
— ANI (@ANI) October 25, 2018
ତେବେ ଆଇବିର ଏହି ଅଧିକାରୀମାନେ କେଉଁ ଉଦ୍ଦେଶ୍ୟରେ ଓ କେଉଁ କାରଣରୁ ଆଲୋକ ବର୍ମାଙ୍କ ଘର ଉପରେ ନଜର ରଖିଥିଲେ ଏ ସମ୍ପର୍କରେ କୌଣସି ସୂଚନା ପୁଲିସ ଗଣମାଧ୍ୟମରେ ପ୍ରକାଶ କରି ନାହିଁ। କେନ୍ଦ୍ର ସରକାରଙ୍କ ନିୟ୍ନ୍ତ୍ରଣ ବାହାରେ ଥିବା ସିବିଆଇ ଉପରେ ଗୁଇନ୍ଦା ବିଭାଗ କେବଳ ସୁରକ୍ଷାଗତ ଦୃଷ୍ଟିକୋଣରୁ ନଜର ରଖିଥିଲା ନା’ ଏହା ପଛରେ ଅନ୍ୟ କୌଣସି ଉଦ୍ଦେଶ୍ୟ ରହିଛି ଏହାକୁ ନେଇ ରାଜନୈତିକ ଆରୋପ ପ୍ରତ୍ୟାରୋପ ଆରମ୍ଭ ହୋଇଯାଇଛି।