ପାଟଣା – ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟ ସତ୍ୟନାରାୟଣ ବିଦ୍ୟାପୀଠ କୁ ୫- ଟି ରେ ସାମିଲ କରାଯାଇ ଏହାର ଉନ୍ନତିକରଣ କରାଯାଇଥିବାବେଳେ ବାରମ୍ବାର ପୁରୁଣା ଗୃହରେ ନୁଆ କରି ପ୍ଲାଷ୍ଟର କରଯାଇଥିବା ପ୍ଲାଷ୍ଟର ଛାତରୁ ଖସିବା ଘଟଣା ଚିନ୍ତାର କାରଣ ହୋଇଛି ।
ନିକଟରେ ଅର୍ଜୁନବିଲା ପ୍ରାଥମିକ ବିଦ୍ୟାଳୟ ଶ୍ରେଣୀ ଗୃହ ରୁ ପ୍ଲାଷ୍ଟର ଖସିଥିବାବେଳେ ଛାତ୍ରଛାତ୍ରୀ ମାନେ ଅଳ୍ପକେ ରକ୍ଷା ପାଇଯାଇଥିଲେ । ହେଲେ ଆଜି ଢେଙ୍କିକୋଟ ସତ୍ୟନାରାୟଣ ବିଦ୍ୟାପୀଠ ର କମନରୁମରୁ ପ୍ଲାଷ୍ଟର ଖସିଛି ।
ପ୍ଲାଷ୍ଟର ଖସିବା ମାତ୍ରେ କଡ କଡ ଶବ୍ଦ ହେବାରୁ ସେହି କୋଠରୀରେ ଥିବା ସଂସ୍କୃତ ଶିକ୍ଷୟତ୍ରୀ ଓ ଅନ୍ୟମାନେ ତତ୍କାଳ ବାହାରକୁ ପଳାଇ ଆସିଥିଲେ । ପ୍ଲାଷ୍ଟର ଖସି ଟେବୁଲ ଓ ଚେୟାର ଭାଙ୍ଗିଥିବା ଦେଖାଯାଇଛି । ନିକଟରେ ଘଟଗାଁ ବ୍ଲକରେ ଅନ୍ୟ ଏକ ବିଦ୍ୟାଳୟରୁ ପ୍ଲାଷ୍ଟର ଖସି ଛାତ୍ରଛାତ୍ରୀ ଆହତ ହେବା ଘଟଣାରେ ନାମକୁ ମାତ୍ର ଜଣେ କନିଷ୍ଠ ଯନ୍ତ୍ରୀଙ୍କୁ ପାଟଣା ବ୍ଲକକୁ ବଦଳି କରଯାଇଥିଲା । ଆଜି ଘଟଣା ପରେ ସତ୍ୟନାରାୟଣ ବିଦ୍ୟାପୀଠର ସମ୍ପୂର୍ଣ୍ଣ ପ୍ଲାଷ୍ଟର ହଟା ଯାଇ ଉନ୍ନତମାନର ନୂତନ ପ୍ଲାଷ୍ଟର କରାଯିବାକୁ ଅଭିଭାବକ ମାନେ ଦାବି ଜଣାଇଛନ୍ତି ।
