କଲମପୁର: କଲମପୁର ଜୁନାଗଡ଼ ମୁଖ୍ୟ ରାସ୍ତାର ବରଗାଁ ଛକ ନିକଟରେ ବୁଧବାର ଘଟିଛି ଏକ ସଡ଼କ ଦୁର୍ଘଟଣା। ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଗୋଟିଏ ବାଇକରେ ଥିବା ମାଆ ପୁଅ ଗୁରୁତର ଭାବେ ଆହତ ହେଇଛନ୍ତି। ସେମାନଙ୍କୁ ଉଦ୍ଧାର କରି କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। କିନ୍ତୁ ଅବସ୍ଥା ଗୁରୁତର ଥିବାରୁ ଉଭୟଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ସୂଚନା ଅନୁସାରେ, ଜୁନାଗଡ଼ ବ୍ଲକ ଅଧିନସ୍ଥ ଗୋଲାମୁଣ୍ଡା ଗ୍ରାମର ପ୍ରମିଳା ନାଗ ଓ କ୍ଷିରୋଦ ନାଗ ନାମକ ମାଆ, ପୁଅ ତେନ୍ତୁଳିଖୁଣ୍ଟି ଗ୍ରାମରେ ଥିବା ପ୍ରମିଳାଙ୍କ ବାପା ଗଜାନନ ଦୁର୍ଗାଙ୍କ ଘରକୁ ଆସି ବୁଧବାର ଅପରାହ୍ନ ୩.୩୦ ବେଳେ କଲମପୁର ଜୁନାଗଡ଼଼ ରାସ୍ତା ଦେଇ ନିଜ ଘରକୁ ଏକ ବାଇକ ଯୋଗେ ଫେରୁଥିଲେ। ଏହି ସମୟରେ ବରଗାଁ ଛକ ନିକଟରେ ଜୁନାଗଡ଼ ପଟରୁ ଆସୁଥିବା ଏକ ଅଜଣା ବାଇକ ସହ ମୁହାଁମୁହିଁ ଧକ୍କା ହୋଇଥିଲା। ଯାହା ଫଳରେ ମାଆ, ପୁଅ ଛିଟିକି ପଡ଼ି ଗୁରୁତର ଭାବେ ଆହତ ହୋଇଛନ୍ତି। ସେମାନଙ୍କ ମୁଣ୍ଡ, ହାତ ଓ ଗୋଡ଼ରେ ଗଭୀର ଆଘାତ ଲାଗିଛି। ତେଣୁ ସେମାନଙ୍କୁ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା କରାଯିବା ପରେ ଅଧିକ ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ଅଜଣା ବାଇକର କୌଣସି ସନ୍ଧାନ ମିଳିନାହିଁ।
