ରେଙ୍ଗାଲପାଲି ଗାଁରୁ ଅଜଗର ଉଦ୍ଧାର

କଲମପୁର: ଜୟପାଟଣା ଥାନା ଅଧିନସ୍ଥ ରେଙ୍ଗାଲପାଲି ଗାଁରୁ ଏକ ୭ଫୁଟ ଲମ୍ବର ଅଜଗର ସାପ ଉଦ୍ଧାର କରାଯାଇଛି । ବନ ବିଭାଗ କର୍ମଚାରୀଙ୍କ ଦ୍ୱାରା ଅଜଗରଟିକୁ ଉଦ୍ଧାର କରାଯାଇଥିବା ବେଳେ, ଏହାର ଓଜନ ୬କେ.ଜି ଥିବା ସୂଚନା ଦିଆଯାଇଛି । ସାପଟିକୁ ଧରିବା ପରେ ସ୍ନେକ ହେଲ୍ପ ଲାଇନ ସଦସ୍ୟଙ୍କ ସହାୟତାରେ ଜଙ୍ଗଲରେ ଛାଡି ଦିଆଯାଇଛି ।

ସୂଚନା ଅନୁସାରେ ଶୁକ୍ରବାର ରେଙ୍ଗାଲପାଲି ଗାଁର ସୁବାସ ବାଗଙ୍କ ଘର ନିକଟରେ ଥିବା ଏକ କାଠ ଗଦାରେ ଏକ ଅଜଗର ସାପ ଥିବା ପରିବାର ଲୋକ ଦେଖି ଭୟଭୀତ ହେଇଯାଇଥିଲେ । ତୁରନ୍ତ ସ୍ଥାନୀୟ ସ୍ନେକ ହେଲ୍ପ ଲାଇନ ସଦସ୍ୟ ନିରଞ୍ଜନ ଶବରଙ୍କୁ ଖବର ଦେଇଥିଲେ । ଏହି ସୂଚନା ପାଇବା ପରେ ଶ୍ରୀ ଶବର ଘଟଣା ସ୍ଥଳରେ ପହଞ୍ଚି କୌଶଳ କ୍ରମେ ଅଜଗରକୁ ଧରିବାରେ ସଫଳ ହେଇଥିଲେ । ଏହାସହ ସ୍ଥାନୀୟ ବନ କର୍ମଚାରୀ ରୁଦ୍ରପ୍ରତାପ ନାଏକଙ୍କ ସହଯୋଗରେ ନିକଟସ୍ଥ ଜଙ୍ଗଲରେ ଅଜଗରଟିକୁ ସୁରକ୍ଷିତ ଭାବେ ଛାଡି ଦିଆଯାଇଛି ।