ଦେବଗଡ଼: ଦେବଗଡ ଜିଲାରେ ଗୋଟିଏ ପରେ ଗୋଟିଏ ହନୁମାନ ମୁଦ୍ରା ଜବତ ହେଉଛି । ଏହା ସତ୍ୱେ ବେଆଇନ ହନୁମାନ ମୁଦ୍ରା କାରବାର ଥମିବାର ନାଁ ନେଉନାହିଁ । ଏହି କ୍ରମରେ ରିଆମାଳ ଥାନା ଅନ୍ତର୍ଗତ ହରିହରପୁର ଗ୍ରାମର ଯୋଗୀନ୍ଦ୍ର ନାଗ ନାମକ ଜଣେ ବ୍ୟକ୍ତି ୨ ଗୋଟି ହନୁମାନ ମୁଦ୍ରା ବିକ୍ରି ପାଇଁ ଗ୍ରାହକ ଖୋଜୁଥିବା ବେଳେ ଦେବଗଡ ଜିଲା ପୁଲିସର ସ୍ୱତନ୍ତ୍ୱ ସ୍କ୍ୱାର୍ଡ ଦ୍ୱାରା ଧରାପଡିଥିବା ଜଣାପଡିଛି । ଗତକାଲି ଜିଲା ପୁଲିସ ମୁଖ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦେବଗଡ ଜିଲା ଆରକ୍ଷୀ ଅଧିକ୍ଷକ ପ୍ରମୋଦ କୁମାର ରଥ ଗଣମାଧ୍ୟମର ପ୍ରତିନିଧି ମାନଙ୍କୁ ଆନୁଷ୍ଠାନିକ ଭାବେ ସୂଚନା ଦେଇଛନ୍ତି । ଏସ୍.ପି. ଶ୍ରୀ ରଥଙ୍କ ସୂଚନା ଅନୁଯାୟୀ ରିଆମାଳ ଥାନା ହରିହରପୁର ଗ୍ରାମର ଯୋଗୀନ୍ଦ୍ର ନାଗ ନାମକ ଜଣେ ବ୍ୟକ୍ତି ନିଜ ପାଖରେ ରଖିଥିବା ୨ଗୋଟି ହନୁମାନ ମୁଦ୍ରା ବିକ୍ରି ପାଇଁ ନିକଟସ୍ଥ କତ୍ରାପାଲି ଛକ ଅଂଚଳରେ ଗ୍ରାହକ ଖୋଜୁଥିଲା ।
ମହିଳାଙ୍କ କାନରେ ପଶିଛି ସାପ; ଦେଖନ୍ତୁ ଏହି ଭିଡିଓ
ଏ ସମ୍ପର୍କରେ ସୂଚନା ପାଇ ଦେବଗଡ ଜିଲା ପୁଲିସର ସ୍ୱତନ୍ତ୍ର ସ୍କ୍ୱାର୍ଡ ଛଦ୍ମ ବେଶରେ ଗ୍ରାହକ ସାଜି ସେଠାରେ ପହଂଚିବା ସହ ଉକ୍ତ ହନୁମାନ ମୁଦ୍ରା କିଣାବିକା ପାଇଁ ମୂଲଚାଲ କରିଥିଲା । ୫ଲକ୍ଷ ଟଙ୍କାରେ ଡିଲ(ମୂଲଚାଲ) ଚୂଡାନ୍ତ ହେବାପରେ ପୁଲିସ ସ୍କ୍ୱାର୍ଡ ବିକ୍ରେତା ଯୋଗୀନ୍ଦ୍ର ଉପରେ ମାଡିବସିବା ସହ ତା’ ନିକଟରୁ ୨ଟି ଯାକ ମୁଦ୍ରା ଜବତ କରିଥିଲା । ସେହିପରି ରିଆମଳ ଥାନାକୁ ଆଣି ପଚରାଉଚରା କରିଥିଲା । ଯୋଗୀନ୍ଦ୍ର ବିରୁଦ୍ଧରେ ବିଭିନ୍ନ ଦଫାରେ ଏକ ମାମଲା ଋଜୁ କରିବା ସହ ତାକୁ କୋର୍ଟ ଚାଲାଣ କରାଯାଇଥିଲା । ମାତ୍ର ଅଦାଲତରେ ଜାମିନ ଆବେଦନ ଖାରଜ ହେବାରୁ ତାକୁ ଜେଲ ହାଜତକୁ ପଠାଇ ଦିଆଯାଇଛି । ଅନ୍ୟପକ୍ଷରେ ଏହି କାର୍ଯ୍ୟରେ ଆଉ କେହି ସମ୍ପୃକ୍ତ ଅଛନ୍ତି କି ନାହିଁ ଏବଂ ଯୋଗୀନ୍ଦ୍ର ଉପରୋକ୍ତ ହନୁମାନ ମୁଦ୍ରା କେଉଁଠୁ ସଂଗ୍ରହ କରିଥିଲା ସେ ନେଇ ଅଧିକ ଖୋଲତାଡ କରୁଥିବା ଏସ୍.ପି. ଶ୍ରୀ ରଥ ପ୍ରକାଶ କରିଛନ୍ତି । ସାମ୍ବାଦିକ ସମ୍ମିଳନୀରେ ଏସ.ଡି.ପି.ଓ. ପ୍ରତ୍ୟୁଷ ମହାପାତ୍ର ଓ ରିଆମାଳ ଥାନା ଅଧିକାରୀଣି ଲଳିତା ପ୍ରଧାନ ପ୍ରମୁଖ ଉପସ୍ଥିତ ଥିଲେ ।
