କଲମପୁର: ଇନ୍ଦ୍ରାବତୀ ଜଳଭଣ୍ଡାରକୁ ଗାଧୋଇବାକୁ ଯାଇ ଜଲଭଣ୍ଡାରର ପାଣି ଭିତରେ ବୁଡି ନିଖୋଜ ହେଇଯାଇଥିବା ଦୁର୍ଖାଲ ଗ୍ରାମର ୫୦ ବର୍ଷିୟ ପିତ୍ତବାସ ନାଏକଙ୍କ ମୃତଦେହ ଉଦ୍ଧାର ହେଇଛି । ସୂଚନା ଅନୁସାରେ ଗତ ମଙ୍ଗଳବାର ଦିନ ପିତବାସ ଗ୍ରାମ ନିକଟରେ ଥିବା ଇନ୍ଦ୍ରାବତୀ ଜଳ ଭଣ୍ଡାରକୁ ସବୁ ଦିନ ଭଳି ଗାଧୋଇବା ପାଇଁ ଯାଇଥିଲେ । ଗାଧୋଉଥିବା ସମୟରେ ହଠାତ୍ ଗୋଡ ଖସି ଯିବାରୁ ଅକାତକାତ ପାଣି ମଧ୍ୟରେ ବୁଡିଯାଇଥିଲେ ।
ଦୀର୍ଘ ସମୟ ଧରି ସେ ଘରକୁ ଫେରିନଥିବାରୁ ପରିବାର ଲୋକ ଜଳ ଭଣ୍ଡାରରେ ବୁଡିଯାଇଥିବା ଆଶଙ୍କା କରିଥିଲେ । ତୁରନ୍ତ ଥୁଆମୂଳ ରାମପୁର ପୁଲିସ ସହ ଅଗ୍ନିଶମ ବିଭାଗକୁ ସୂଚନା ଦେଇଥିଲେ । ଉଭୟ ପୁଲିସ ଓ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ରାତି ପ୍ରାୟ ୮ଟା ପର୍ଯ୍ୟନ୍ତ ଖୋଜା ଖୋଜି କରିଥିଲେ ମଧ୍ୟ ନିଖୋଜ ପିତବାସଙ୍କ କୌଣସି ସନ୍ଧାନ ପାଇନଥିଲେ । ପୁନଃ ବୁଧବାର ସକାଳେ ଅଗ୍ନିଶମ ବାହିନୀ ହାବିଲଦାର ଶିବ ପ୍ରସାଦ ପାତ୍ରଙ୍କ ନେତୃତ୍ୱରେ ଆଗ୍ନିକ ରଞ୍ଜିତ ଖଣ୍ଡଗିରୀ, ଲକ୍ଷ୍ମଣ ଧାରୁଆ, ମଦନ ମୋହନ ଶବର ଓ ସୁନିଲ କୁମାର ବେହେରା ପ୍ରମୁଖ ଏକ ମଟର ଚାଳିତ ଡଙ୍ଗାରେ ଜଳଭଣ୍ଡାର ମଧ୍ୟରେ ସର୍ଚ୍ଚ ଅପରେସନ କରିଥିଲେ ।
ପାଣ ଭିତରେ ବୁଡି ରହିବାର ଦୀର୍ଘ ୨୦ ଘଣ୍ଟା ପରେ ପ୍ରାୟ ୫୦ଫୁଟ ପାଣି ଭିତରେ ବୁଡି ରହିଥିବା ପିତବାସଙ୍କ ଶବକୁ ଆଗ୍ନିକ ମାନେ ଉଦ୍ଧାର କରି ଜଳ ଭଣ୍ଡାର କୂଳକୁ ଆଣିଥିଲେ । ଏହାପରେ ପୁଲିସ ଶବ ବ୍ୟବଚ୍ଛେଦ ପାଇଁ ଥୁଆମୂଳ ରାମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତରିତ କରାଯାଇଥିଲା । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ଶବ ହସ୍ତାନ୍ତରିତ କରାଯାଇଛି ।
