ଓଡ଼ିଶାର ୨ ପୁଲିସ କର୍ମୀଙ୍କୁ ସାହସିକତା ପାଇଁ ପୁଲିସ ପଦକ
ବିଶିଷ୍ଟ ସେବା ପାଇଁ ଓଡ଼ିଶାର ୨ ପୁଲିସ ଅଧିକାରୀଙ୍କୁ ରାଷ୍ଟ୍ରପତି ପୁଲିସ ପଦକ
୧୧ ଜଣ ଓଡ଼ିଶା ପୁଲିସ କର୍ମୀଙ୍କୁ ଉଲ୍ଲେଖନୀୟ ସେବା ପାଇଁ ପୁଲିସ ପଦକ
ନୂଆଦିଲ୍ଲୀ : ସ୍ୱାଧୀନତା ଦିବସ-୨୦୨୨ ଉପଲକ୍ଷେ ଦେଶର ମୋଟ୍ ୧୦୮୨ ଜଣ ପୁଲିସ କର୍ମୀଙ୍କୁ ପଦକ ପ୍ରଦାନ କରାଯାଇଛି।୩୪୭ ଜଣ ପୁଲିସ କର୍ମୀଙ୍କୁ ସାହସିକତା ପୁରସ୍କାର ପ୍ରଦାନ କରାଯାଇଥିବା କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଘୋଷଣା କରାଯାଇଛି । ଅନ୍ୟପକ୍ଷରେ ବିଶିଷ୍ଟ ସେବା ପାଇଁ ୮୭ ଜଣ ପୁଲିସ କର୍ମୀଙ୍କୁ ରାଷ୍ଟ୍ରପତି ପୁଲିସ ପଦକ ପ୍ରଦାନ କରାଯାଇଛି । ସେହିପରି ୬୪୮ ଜଣ ପୁଲିସ କର୍ମୀଙ୍କୁ ଉଲ୍ଲେଖନୀୟ ସେବା ପାଇଁ ପଦକ ପ୍ରଦାନ କରାଯାଇଛି ।
ଓଡ଼ିଶା ପୁଲିସର ଦୁଇ ଜଣ ଅଧିକାରୀଙ୍କୁ ସାହସିକତା ପାଇଁ ପୁଲିସ ପଦକ ପ୍ରଦାନ କରିବା ଲାଗି ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଘୋଷଣା କରାଯାଇଛି । ସେମାନେ ହେଲେ କମାଣ୍ଡୋ କୁମାର କର୍ମୀ ଓ କମାଣ୍ଡୋ ପୀତବାସ ପାଣ୍ଡେ
ସେହିପରି ଓଡ଼ିଶାର ଦୁଇ ପୁଲିସ ଅଧିକାରୀ କଟକ-ଭୁବନେଶ୍ୱର ଦ୍ବୈତ ନଗରୀର ଆରକ୍ଷୀ ଆୟୁକ୍ତ ସୌମେନ୍ଦ୍ର ପ୍ରିୟଦର୍ଶୀ ଓ ଭୁବନେଶ୍ୱର ସୁରକ୍ଷା ୱିଙ୍ଗର ଭାରପ୍ରାପ୍ତ ଆରକ୍ଷୀ ଅଧିକ୍ଷକ ଶ୍ରୀ ସରୋଜ କୁମାର ମହାପାତ୍ର ବିଶିଷ୍ଟ ସେବା ପାଇଁ ରାଷ୍ଟ୍ରପତି ପୁଲିସ ପଦକ ପାଇଛନ୍ତି ।
ଅନ୍ୟପକ୍ଷରେ ୧୧ ଜଣ ଓଡ଼ିଶା ପୁଲିସ କର୍ମୀଙ୍କୁ ଉଲ୍ଲେଖନୀୟ ସେବା ପାଇଁ ପୁଲିସ ପଦକ ପ୍ରଦାନ କରାଯାଇଛି । ସେମାନେ ହେଲେ :
- କଟକ ଭିଜିଲାନ୍ସ ନିର୍ଦ୍ଦେଶାଳୟର ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀ ପ୍ରକାଶ କୁମାର ନାୟକ
- ଭୁବନେଶ୍ୱର କ୍ରାଇମବ୍ରାଞ୍ଚ ସିଆଇଡି ଏସଟିଏଫର ଉପ ଆରକ୍ଷୀ ଆୟୁକ୍ତ ଶ୍ରୀ ସଚ୍ଚିଦାନନ୍ଦ ରଥ
- ଭୁବନେଶ୍ୱର ବିଜୁ ପଟ୍ଟନାୟକ ରାଜ୍ୟ ପୁଲିସ ଏକାଡେମୀର ଉପ ଆରକ୍ଷୀ ଆୟୁକ୍ତ ଶ୍ରୀ ଗୁରୁପ୍ରସାଦ ଶିବଶଙ୍କର ନନ୍ଦ
- ରାଉରକେଲାର ଉପ ଆରକ୍ଷୀ ଅଧିକ୍ଷିକା ଶ୍ରୀମତୀ ବନିତା ମାଝୀ
- କଟକ କ୍ରାଇମବ୍ରାଞ୍ଚ ସିଆଇଡିର ପୁଲିସ ସବଇନ୍ସପେକ୍ଟର ଶ୍ରୀ ଏନ. ତ୍ରିନାଥ ଦୋରା
- ସମ୍ବଲପୁର ସ୍ପେଶଲ ସ୍କ୍ବାଡର ପୁଲିସ ଏଏସଆଇ ଶ୍ରୀ ମହମ୍ମଦ ଜାହାଙ୍ଗୀର
- ଝାରସୁଗୁଡ଼ା ଓଏସଏପି ଦ୍ବିତୀୟ ବାଟାଲିୟନର ହାବିଲଦାର ଶ୍ରୀ ବିଷ୍ଣୁ କୁମାର ବୁରା
- ଅନୁଗୁଳ ପୁଲିସର ଡ୍ରାଇଭର ହାବିଲଦାର ଶ୍ରୀ ହୃଷିକେଶ ବାରିକ
- କୋରାପୁଟ ଏସଓଜି, ଏଇଟି ଏଣ୍ଡ ଆରସିର ସହାୟକ ଆର୍ମରର୍ ଶ୍ରୀ ବସନ୍ତ କୁମାର ଡାକୁଆ
- ସୁନ୍ଦରଗଡ଼ ଡିଏଫଏସଏଲର କନେଷ୍ଟବଳ ଶ୍ରୀ ଅଞ୍ଜନ କୁମାର ମହାନ୍ତି
- କୋରାପୁଟ ଓଏସଏପି ତୃତୀୟ ବାଟାଲିୟନର ସିପାହୀ ଶ୍ରୀ ପ୍ରଶାନ୍ତ ପରିଡ଼ା
ଜମ୍ମୁ ଓ କଶ୍ମୀରରେ ସାହସିକ କାର୍ଯ୍ୟ କରିଥିବା ୨୦୪ ଜଣ ସୁରକ୍ଷା କର୍ମୀଙ୍କୁ ସାହସିକତା ପଦକ ପ୍ରଦାନ କରାଯାଇଛି । ବାମପନ୍ଥୀ ଉଗ୍ରବାଦ କ୍ଷେତ୍ରରେ ସାହସିକ କାର୍ଯ୍ୟ କରିଥିବା ୮୦ ଜଣ ପୁଲିସ କର୍ମୀଙ୍କୁ ସାହସିକତା ପ୍ରଦାନ କରାଯାଇଥିବା ବେଳେ ଉତ୍ତର ପୂର୍ବାଞ୍ଚଳ କ୍ଷେତ୍ରରେ କାର୍ଯ୍ୟ କରିବା ପାଇଁ ୧୪ ଜଣ ସୁରକ୍ଷାକର୍ମୀ ଏହି ପୁରସ୍କାର ପାଇଛନ୍ତି । ସାହସିକତା ପୁରସ୍କାର ପାଇବାକୁ ଥିବା ୩୪୭ ଜଣ ସୁରକ୍ଷାକର୍ମୀଙ୍କ ମଧ୍ୟରେ ସିଆରପିଏଫର ୧୦୯ ଜଣ, ଜମ୍ମୁ ଓ କଶ୍ମୀର ପୁଲିସର ୧୦୮ ଜଣ, ବିଏସଏଫର ୧୯ ଜଣ, ମହାରାଷ୍ଟ୍ରର ୪୨ ଜଣ, ଛତିଶଗଡ଼ର ୧୫ ଜଣ ଏବଂ ଅନ୍ୟମାନେ ବିଭିନ୍ନ ରାଜ୍ୟ/କେନ୍ଦ୍ର ଶାସିତ ପ୍ରଦେଶ ଓ କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀର ପୁଲିସ କର୍ମୀ ରହିଛନ୍ତି ।
