ପାଟନା: ପୁଣି ବିହାରର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କଲେ ନୀତୀଶ କୁମାର। ୮ମ ଥର ପାଇଁ ସେ ବିହାରର ମୁଖ୍ୟମନ୍ତ୍ରୀ ହୋଇଛନ୍ତି। ବୁଧବାର ରାଜ୍ୟପାଳ ଫଗୁ ଚୌହ୍ବାନ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି। ନୀତୀଶଙ୍କ ସହିତ ତେଜସ୍ବୀ ଯାଦବ ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି।
ବିଜେପିଠାରୁ ମେଣ୍ଟ ସମ୍ପର୍କ ଛିନ୍ନ କରିବା ପରେ ନୀତୀଶ ଲାଲୁ ପ୍ରସାଦ ଯାଦବଙ୍କ ଆରଜେଡି ସହିତ ହାତ ମିଳାଇଛନ୍ତି। ନୀତୀଶଙ୍କୁ ଆରଜେଡି ସହିତ କଂଗ୍ରେସ, ସିପିଆଇ, ସିପିଆଇଏମ୍ ଆଦି ୭ଟି ଦଳ ସମର୍ଥନ କରିଛନ୍ତି। ଏହି ୭ଟି ଦଳକୁ ନେଇ ନୀତିଶଙ୍କ ନେତୃତ୍ବରେ ଆଜି ବିହାରରେ ମହାମେଣ୍ଟ ସରକାର ଗଠନ ହୋଇଛି।
ସୂଚନାଯୋଗ୍ୟ, ବିହାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ ନୀତୀଶ ଆରଜେଡି ନେତା ତେଜସ୍ବୀ ଯାଦବଙ୍କୁ ସାକ୍ଷାତ କରିଥିଲେ। ତେଜସ୍ବୀ ମହାମେଣ୍ଟକୁ ନୀତୀଶଙ୍କୁ ସ୍ବାଗତ କରିଥିଲେ। ପରେ ମହାମେଣ୍ଟ ବୈଠକରେ ନୀତୀଶଙ୍କୁ ବିଧାୟକ ଦଳ ନେତା ନିର୍ବାଚିତ କରାଯାଇଥିଲା। ବିଧାୟକ ଦଳ ନେତା ନିର୍ବାଚିତ ହେବା ପରେ ନୀତୀଶ ନୂଆ ସରକାର ଗଠନ ପାଇଁ ରାଜ୍ୟପାଳଙ୍କୁ ଭେଟି ଦାବି ଜଣାଇଥିଲେ। ତେଜସ୍ବୀଙ୍କୁ ସାକ୍ଷାତ କାଳରେ ନୀତୀଶ କହିଥିଲେ ପଛ କଥାକୁ ଭୁଲି ଯାଇ ବିହାରରେ ନୂଆ ଅଧ୍ୟାୟ ସୃଷ୍ଟି କରିବା।
