ନୂଆଦିଲ୍ଲୀ: ପୁଣି ଭାରତ ସୀମାରେ ଡ୍ରୋନ୍ ଉଡାଇଲା ପାକିସ୍ତାନ । ଗତକାଲି (ଶନିବାର) ବିଳମ୍ବିତ ରାତି ପ୍ରାୟ ସାଢ଼େ ୧୨ଟାରେ ଭାରତ-ପାକିସ୍ତାନ ସୀମାରେ ଥିବା ବାମିୟାଲ ସେକ୍ଟରରେ ପାକିସ୍ତାନ ତାର ଡ୍ରୋନ୍ ଭାରତ ସୀମାରେ ପ୍ରବେଶ କରାଇବାକୁ ଚେଷ୍ଟା କରୁଥିବା ଦେଖିବାକୁ ମିଳିଥିଲା । ହେଲେ ସେଠାରେ ସଜାଗ ରହିଥିବା ବିଏସଏଫ ଯବାନ ମାନେ ଏହାର କଡ଼ା ଜବାବ ଦେଇଛନ୍ତି । ଯବାନଙ୍କ ପକ୍ଷରୁ ଗୁଳି ଚାଳନା କରାଯାଉ ଡ୍ରୋନକୁ ପାକିସ୍ତାନକୁ ପୁଣି ଲେଉଟାଇ ଦିଆଯାଇଛି ।
ଏନେଇ ବିଏସଏଫର ଜଣେ ଅଧିକାରୀ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ପାକିସ୍ତାନ ହ୍ୟାଣ୍ଡେଲର ମାନେ ଭାରତ ସୀମାକୁ ଡ୍ରୋନ୍ ପଠାଇବାକୁ ଚେଷ୍ଟା କରିଛନ୍ତି । ହେଲେ ବିଏସଏଫ କର୍ମଚାରୀମାନେ ଏହାକୁ ଗୁଳିଚଳାଇ ଫେରାଇ ଦେଇଛନ୍ତି । ଡ୍ରୋନ୍ଟି ପ୍ରାୟ ୩୫୦ରୁ ୪୦୦ ଫୁଟ ଉଚ୍ଚରେ ରହିଥିବା ଅନୁମାନ କରାଯାଉଥିଲା । ଏହା ଜାଣିବା ପରେ ତୁରନ୍ତ ପଦକ୍ଷେପ ନିଆଯାଇଥିଲା ।
ଯବାନ ମାନେ ଆଇଏନଏସଏଏସ୍ ରାଇଫଲ ଏବଂ ଏଲଏମଜିରୁ ୪୬ ରାଉଣ୍ଡ ଗୁଳି ଚାଳନା କରିଥିଲେ । ପରେ ଦୁଇଟି ବୋମା ମଧ୍ୟ ଫିଙ୍ଗା ଯାଇଥିଲା । ଯାହାଫଳରେ କିଛି ସମୟ ପରେ ଡ୍ରୋନର ଶବ୍ଦ ଆଉ ଶୁଣିବାକୁ ମିଳିନଥିଲା ।
