ସିଙ୍ଗାପୁର : ଦୁଇଥର ଅଲିମ୍ପିକ୍ସ ବିଜୟିନୀ ଭାରତୀୟ ମହିଳା ବ୍ୟାଡମିଣ୍ଟନ ତାରକା ପି.ଭି ସିନ୍ଧୁ ସିଙ୍ଗାପୁର ଓପନ ସୁପର-୫୦୦ ପ୍ରତିଯୋଗିତାର ସେମିଫାଇନାଲରେ ପ୍ରବେଶ କରିଛନ୍ତି। ୭ମ ସିଡ୍ ସିନ୍ଧୁ ଶୁକ୍ରବାର ଖେଳାଯାଇଥିବା କ୍ବାର୍ଟର ଫାଇନାଲ ମ୍ୟାଚରେ ଚୀନର ହାନ୍ ୟୁଇଙ୍କୁ ୧୭-୨୧, ୨୧-୧୧ ଓ ୨୧-୧୯ରେ ପରାସ୍ତ କରି ସେମିଫାଇନାଲରେ ପହଞ୍ଚିଛନ୍ତି। ଏଥି ସହିତ ୟୁଇଙ୍କ ବିପକ୍ଷରେ ସିନ୍ଧୁ କ୍ରମାଗତ ୩ଟି ମ୍ୟାଚ ଜିତିବାରେ ସଫଳ ହୋଇଛନ୍ତି। ପ୍ରଥମ ସେଟ୍ରେ ୟୁଇ ଚମତ୍କାର ପ୍ରଦର୍ଶନ କରି ମ୍ୟାଚକୁ ୨୧-୧୭ରେ ଜିତି ନେଇଥିଲେ। ଦ୍ବିତୀୟ ସେଟ୍କୁ ସିନ୍ଧୁ ଦୃଢତାର ସହିତ ପ୍ରତ୍ୟାବର୍ତ୍ତନ କରିଥିଲେ। ଦ୍ବିତୀୟ ସେଟ୍କୁ ସିନ୍ଧୁ ଏକତରଫା ଭାବେ ୨୧-୧୧ରେ ଜିତି ମ୍ୟାଚକୁ ୧-୧ ସ୍ତରକୁ ଆଣିଥିଲେ। ଅନ୍ତିମ ସେଟ୍ ମ୍ୟାଚ ସଂଘର୍ଷପୂର୍ଣ୍ଣ ହୋଇଥିଲା। ସିନ୍ଧୁ ପ୍ରଥମ ବିରତି ବେଳକୁ ୮-୧୧ରେ ପଛୁଆ ରହିଥିଲେ। ପରବର୍ତ୍ତୀ ସମୟରେ ୟୁଇ ୧୪-୯ରେ ଆଗୁଆ ରହିଥିଲେ। ପରେ ସିନ୍ଧୁ ଭଲ ପ୍ରଦର୍ଶନ କରିବା ସହିତ ମ୍ୟାଚକୁ ୨୧-୧୯ରେ ଜିତି ନେଇଥିଲେ। ମ୍ୟାଚ ୬୨ ମିିନିଟ୍ ଧରି ଖେଳାଯାଇଥିଲା। ଥାଇଲାଣ୍ଡ ଓପନ ପରେ ସିନ୍ଧୁ ଆଉ ଏକ ପ୍ରତିଯୋଗିତାର ସେମିଫାଇନାଲରେ ପ୍ରବେଶ କରିଛନ୍ତି। ସିନ୍ଧୁ ସେମିଫାଇନାଲରେ ଜାପାନର ସିଇନା କାୱାକାମିଙ୍କୁ ଭେଟିବେ। ଅନ୍ୟତମ ଭାରାତୀୟ ତଥା ଲଣ୍ଡନ ଅଲିମ୍ପିକ୍ସ କାଂସ୍ୟ ବିଜୟିନୀ ସାଇନା ନେହ୍ବାଲ କ୍ବାର୍ଟର ଫାଇନାଲରେ ଜାପାନର ଓୟା ଓହାରିଙ୍କ ନିକଟରୁ ୧୩-୨୧, ୨୧-୧୫ ଓ ୨୦-୨୧ରେ ପରାଜିତ ହୋଇଛନ୍ତି। ଅଢେଇ ବର୍ଷରୁ ଅଧିକ ସମୟ ପରେ କୌଣସି ଏକ ସୁପର ବ୍ୟାଡମିଣ୍ଟନ ପ୍ରତିଯୋଗିତାର କ୍ବାର୍ଟର ଫାଇନାଲରେ ପ୍ରବେଶ କରିଥିବା ସାଇନାଙ୍କ ସେମିଫାଇନାଲ ଆଶା ଶେଷ ହୋଇଯାଇଛି। ପୁରୁଷ ଏକକ କ୍ବାର୍ଟର ଫାଇନାଲରେ ଏଚ୍ ଏସ୍ ପ୍ରଣୟ ୧୨-୨୧, ୨୧-୧୪ ଓ ୨୧-୧୮ରେ ଜାପାନର କାଡାଇ ନାରାଓକାଙ୍କ ନିକଟରୁ ପରାଜିତ ହୋଇଛନ୍ତି।
Popular Categories
Previous article
Next article