ଡେସ୍କ: ରାଷ୍ଟ୍ରପତି ଜୋ ବାଇଡେନଙ୍କ ମଧ୍ୟପ୍ରାଚ୍ୟ ଗସ୍ତ ପାଇଁ ନିଯୁକ୍ତ ଜଣେ ସିକ୍ରେଟ୍ ସର୍ଭିସ ଏଜେଣ୍ଟଙ୍କୁ ଇସ୍ରାଏଲରେ ଅଟକ ରଖାଯିବା ସହ ଫେରାଇ ଦିଆଯାଇଥିବା ଜଣାପଡିଛି। ନାମ ନଥିବା ସେହି ପୁରୁଷ ଏଜେଣ୍ଟ ଜଣଙ୍କ ସିକ୍ରେଟ୍ ସର୍ଭିସ କାଉଣ୍ଟର ଆସଲ୍ଟ ଟିମର ସଦସ୍ୟ ଏବଂ ଆମେରିକା ରାଷ୍ଟ୍ରପତି ବାଇଡେନ ଆସିବା ପୂର୍ବରୁ ସେ ଇସ୍ରାଏଲରେ ନିୟୋଜିତ ହୋଇଥିଲେ ବୋଲି ରିପୋର୍ଟ ମିଳିଛି। ସେହି ଟିମ ସାଧାରଣତଃ ବିଦେଶ ଗସ୍ତ ସମୟରେ ରାଷ୍ଟ୍ରପତିଙ୍କୁ ସୁରକ୍ଷା ଯୋଗାଇଥାଏ।
ସୂଚନା ଅନୁଯାୟୀ, ସୋମବାର ରାତିରେ ଜେରୁଜେଲମର ମହାନେ ୟେହୁଦା ମାର୍କେଟରେ ଏକ ବାର ବାହାରେ ଜଣେ ମହିଳାଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ତେବେ ମହିଳା ଜଣକ ଆହତ ହୋଇଥିବା କିମ୍ବା ତାଙ୍କ ପ୍ରତି ଯୋଉଁ ନିର୍ଯାତନା ଅଭିଯୋଗ ହୋଇ ନାହିଁ ବୋଲି ଏନବିସି ନ୍ୟୁଜ୍ ରିପୋର୍ଟ କରିଛି। ଏଜେଣ୍ଟ ଜଣଙ୍କ ମହିଳାଙ୍କ ସହ ଯୁକ୍ତିତର୍କ କରିବା ସହିତ ତାଙ୍କୁ ଧକ୍କା ମାରିଥିବା ଅଭିଯୋଗ ହୋଇଛି। ଘଟଣାସ୍ଥଳକୁ ଇସ୍ରାଏଲ୍ ପୁଲିସକୁ ଡକାଯାଇଥିଲା ଏବଂ ଏଜେଣ୍ଟକୁ ଅଳ୍ପ ସମୟ ଧରି ପଚରାଉଚରା ପରେ ବିନା ଅଭିଯୋଗରେ ମୁକ୍ତ କରାଯାଇଥିଲା। ସମ୍ପୃକ୍ତ କର୍ମଚାରୀ ଆମେରିକାକୁ ଫେରିଛନ୍ତି।
