ବେଗୁନିଆ: ବେଗୁନିଆ ତହସିଲ ଅଞ୍ଚଳର ବିଭିନ୍ନ ପଞ୍ଚାୟତରେ ଥିବା ଶହ ଶହ ବେଆଇନ ପଥର ଖଣିରୁ ପଥର ମାଫିଆମାନେ ଦିନ ରାତି ପଥର ଖୋଳି ଚୋରା ଚାଲାଣ କରୁଥିବା ବେଳେ ପ୍ରଶାସନ ତରଫରୁ ସେମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ । ଏବେ ଗତ କିଛି ଦିନ ହେବ ତହସିଲ ଏବଂ ଥାନା ପକ୍ଷରୁ ଚଢ଼ାଉ କରାଯାଉ ନଥିବାରୁ ସେମାନେ ନିର୍ଭୟରେ ପଥର ଚୋରା ଚାଲାଣ କରୁଛନ୍ତି । ତହସିଲ ପ୍ରଶାସନ ତରଫରୁ ଏଠାରେ ୩ଟି ପଥରଖଣି ନିଲାମ ଦିଆଯାଇଥିବା ବେଳେ ବେଆଇନ ପଥର ଖଣିରୁ ପଥର ନେଇ ଯାଉଥିବା ଗାଡିବାଲା ନିଲାମଧାରୀଙ୍କଠାରୁ ୱାଇ ଫର୍ମ ବହୁ ମୂଲ୍ୟରେ ନେଇ ତାରିଖ ନପକାଇ ପଥର ଚୋରା ଚାଲାଣ କରୁଛନ୍ତି । ନିଲାମଧାରୀଙ୍କ ଖଣିରୁ ପଥର ନନେଇ ହଜାର ହଜାର ଟଙ୍କା ବିନିମୟରେ ୱାଇ ଫର୍ମ ନେବା ଯୋଗୁଁ ନିଲାମଧାରୀ ମଧ୍ୟ ମାଲା ମାଲ ହେଉଛି । ତେଲି ତେଲିଆ ଏକାଠି ହେବା ଦ୍ୱାରା ସରକାରଙ୍କର ଲକ୍ଷ ଲକ୍ଷ ଟଙ୍କା ରାଜସ୍ୱ ହାନି ହେଉଛି । ନିଲାମ ଦିଆ ଯାଇନଥିବା ବେଆଇନ ପଥର ଖଣି ଗୁଡିକରୁ ଭୋର ସମୟରେ ଶହ ଶହ ପଥର ବୋଝେଇ ଟ୍ରକ ବିଭିନ୍ନ ଅଞ୍ଚଳକୁ ଯାଉଥିବାବେଳେ ଆଜି ଭୋର ୪.୩୦ରେ ତହସିଲଦାର ପୃଥ୍ୱୀରାଜ ମଣ୍ଡଳ, ସୁପରଭାଇଜର କୃଷ୍ଣଚନ୍ଦ୍ର ମହାପାତ୍ର, ଶୁଭଙ୍କର ମାଝୀ ଏବଂ ସଞ୍ଜୟ ସେନାପତି ପ୍ରମୁଖ ପଥର ଗାଡି ଗୁଡିକ ଧରିବା ପାଇଁ ଯାଇଥିବାବେଳେ ସେମାନେ ଖବର ପାଇ ଅନ୍ୟ ରାସ୍ତାରେ ପଳାଇଯାଇଥିଲେ। ବେଗୁନିଆ ପରିଚ୍ଛଳ ଏବଂ ଓଗାଳପୁର ରାସ୍ତାରେ ବେଗୁନିଆ ଆର ଆଇ ବିଜୟକୁମାର ମାର୍ଥା ଏବଂ ଅମିନ ବୁଟୁ ସାହୁ ପଥର ବୋଝେଇ ଗାଡି ଜବତ କରିବା ପାଇଁ ଯାଉଥିବାବେଳେ ୩ ଟି ପଥରବୋଝେଇ ଗାଡିକୁ ଦେଖି ଅଟକାଇଥିଲେ । କିନ୍ତୁ ସେଥିମଧ୍ୟରୁ ୨ଟି ଗାଡି ଖସି ପଳାଇଯାଇଥିବା ବେଳେ ଗୋଟିଏ ପଥର ବୋଝେଇ ଟ୍ରାକ୍ଟରକୁ ଜବତ କରି କାର୍ୟ୍ୟାଳୟକୁ ଆଣିଥିବା ଜଣାପଡିଛି ।
Popular Categories
Previous article
Next article