ନୂଆଦିଲ୍ଲୀ: ଆନନ୍ଦ ମହିନ୍ଦ୍ରା ଜଣେ ଉଦାରମନା ବ୍ୟକ୍ତି ବୋଲି ଅନେକ ଥର ତାଙ୍କ ଟ୍ବିଟର ଆକାଉଣ୍ଟରୁ ଜଣାପଡ଼ିଛି। କିନ୍ତୁ ଏଥର ମାତୃ ଦିବସ ଅବସରରେ ସେ ‘ଇଡ୍ଲୀ ଆମ୍ମା’ଙ୍କୁ ଏକ ଖାସ୍ ଉପହାର ଦେଇଛନ୍ତି। ସବୁଠୁ ଭଲ କଥା ହେଉଛି କେବଳ ଗୋଟିଏ ଟ୍ୱିଟରୁ ହିଁ ଇଡଲି ଆମ୍ମାଙ୍କ ସହ ତାଙ୍କର ଏହି ଗଭୀର ସମ୍ପର୍କ ଗଢି ଉଠିଥିଲା।
ଆନନ୍ଦ ମହିନ୍ଦ୍ରା ମାତୃ ଦିବସ ଅବସରରେ ଇଡ୍ଲୀ ଆମ୍ମାଙ୍କୁ ଏକ ଘର ଉପହାର ଦେଇଛନ୍ତି। ଏନେଇ ସେ ଟ୍ବିଟରରେ ଏକ ଭିଡିଓ ପୋଷ୍ଟ କରିବା ସହ ଲେଖିଛନ୍ତି, ‘‘ଆମ ଟିମ୍ ପ୍ରଶଂସାର ଯୋଗ୍ୟ, ଯିଏ ଠିକ୍ ସମୟରେ ଗୃହ ନିର୍ମାଣ କାର୍ଯ୍ୟ ଶେଷ କରି ମାତୃ ଦିବସରେ ଇଡ୍ଲୀ ଆମ୍ମାକୁ ଉପହାର ଭାବେ ଦେଇଛନ୍ତି। ସେ ମାଆର ଗୁଣ ଯେପରିକି, ଲାଳନପାଳନ, ଯତ୍ନ ଓ ନିଃସ୍ବାର୍ଥପରତାର ଅବତାର। ତାଙ୍କୁ ଓ ତାଙ୍କ କାମକୁ ସମର୍ଥନ କରିବାର ସୌଭାଗ୍ୟ ପ୍ରାପ୍ତି ହୋଇଛି। ଆପଣ ସମସ୍ତଙ୍କୁ ମାତୃ ଦିବସର ଅଭିନନ୍ଦନ।’’
Immense gratitude to our team for completing the construction of the house in time to gift it to Idli Amma on #MothersDay She’s the embodiment of a Mother’s virtues: nurturing, caring & selfless. A privilege to be able to support her & her work. Happy Mother’s Day to you all! pic.twitter.com/LgfR2UIfnm
— anand mahindra (@anandmahindra) May 8, 2022
କିଏ ଏହି ‘ଇଡ୍ଲୀ ଆମ୍ମା’ ?
ଆଜି ଯାହାଙ୍କୁ ସମସ୍ତେ ‘ଇଡ୍ଲୀ ଆମ୍ମା’ ବୋଲି ଜାଣନ୍ତି, ସେ ହେଉଛନ୍ତି ତାମିଲନାଡ଼ୁର କୋୟମ୍ବଟୁର ଜିଲାରେ ବାସ କରୁଥିବା ଏମ୍. କମଲାଥଲ। ପ୍ରାୟ ୮୫ ବର୍ଷୀୟ କମଲାଥଲ ତାଙ୍କ ଅଞ୍ଚଳରେ କାମ କରୁଥିବା ପ୍ରବାସୀ ଶ୍ରମିକ ଓ ଅନ୍ୟ ଲୋକମାନଙ୍କୁ ମାତ୍ର ଏକ ଟଙ୍କାରେ ଇଡ୍ଲୀ ବିକ୍ରି କରିଥାଆନ୍ତି। ଗତ ୩ ବର୍ଷ ଧରି ସେ ଏହି କାମ କରୁଛନ୍ତି।
ଏହି ଟ୍ବିଟ୍ ଦ୍ବାରା ଯୋଡ଼ି ହୋଇଥିଲା ମହିନ୍ଦ୍ରା-ଆମ୍ମାଙ୍କ ସମ୍ପର୍କ:
ଆନନ୍ଦ ମହିନ୍ଦ୍ରା ୨୦୧୯ ସେପ୍ଟେମ୍ବର ୧୦ ତାରିଖରେ ‘ଇଡ୍ଲୀ ଆମ୍ମା’ଙ୍କ ଏକ ଭିଡିଓ ଶେୟାର କରିଥିଲେ। ସେତେବେଳେ ସେ ‘ଇଡ୍ଲୀ ଆମ୍ମା’ଙ୍କ ବ୍ୟବସାୟରେ ବିନିଯୋଗ କରିବା ଓ ତାଙ୍କୁ କାଠ ଚୁଲି ପରିବର୍ତ୍ତେ ଗ୍ୟାସ୍ ଚୁଲା ଯୋଗାଇଦେବାକୁ କହିଥିଲେ। ଯେତେବେଳେ ମହିନ୍ଦ୍ରାଙ୍କ ଟିମ୍ ‘ଇଡ୍ଲୀ ଆମ୍ମା’ଙ୍କୁ ଭେଟିବାକୁ ଯାଇଥିଲେ, ସେତେବେଳେ ସେ ଏକ ନୂଆ ଘର ପାଇଁ ଇଚ୍ଛା ପ୍ରକାଶ କରିଥିଲେ। ତାଙ୍କ ଇଚ୍ଛାକୁ ସମ୍ମାନ ଜଣାଇ ଆନନ୍ଦ ମହିନ୍ଦ୍ରା ନିଜ ପ୍ରତିଶ୍ରୁତି ପୂରା କରିଛନ୍ତି।
