ବଲାଙ୍ଗିର: ପତ୍ନୀଙ୍କ ବାହାଘର । ଏହି ଖବର ପାଇବା ପରେ ସ୍ୱାମୀ ବାହାଘର ରୋକିବା ପାଇଁ ପୁଅ ସହ ଥାନାର ଦ୍ୱାରସ୍ଥ ହୋଇଛନ୍ତି । ବଲାଙ୍ଗିର ଜିଲା ଲାଠୋର ଥାନା ବେନ୍ଦେର ଗାଁର ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ବେନ୍ଦେର ଗାଁର ପିତବାସ ମାଝୀ ଗତ ୨୦୧୭ ଫେବ୍ରୁଆରୀ ୧୪ ତାରିଖରେ ଗୁଣମତି ମାଝୀଙ୍କୁ ସାମାଜିକ ରୀତିନୀତିରେ ବିବାହ କରିଥିଲେ । ସେମାନଙ୍କର ୮ ବର୍ଷର ପୁଅଟିଏ ରହିଛି । ପିତବାସଙ୍କ ପତ୍ନୀ ପାଟଣାଗଡ ଅବକାରୀ ବିଭାଗରେ କନେଷ୍ଟବଳ ଭାବେ ଚାକିରି କରୁଥିଲେ ଓ ପାଟଣାଗଡରେ ଏକୁଟିଆ ରହୁଥିଲେ ।
ଉଭୟ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ତିକ୍ତତା ଦେଖା ଦେଇଥିଲା । ତେବେ ଗୁଣମତି ଅନ୍ୟତ୍ର ବିବାହ କରୁଥିବା ଜାଣି ତାଙ୍କ ବିବାହ ଅଟକାଇବା ପାଇଁ ତାଙ୍କ ୮ ବର୍ଷର ପୁଅ ଉପେନ୍ଦ୍ରକୁ ଧରି ପାଟଣାଗଡ ଥାନାରେ ଲିଖିତ ଅଭିଯୋଗ କରିଛନ୍ତି । ଗୁଣମତି ପାଟଣାଗଡ ବ୍ରହ୍ମପୁରର ଅପୂର୍ବ ବିଶ୍ୱଦୀପ୍ତ ପରିଡା ନାମକ ବ୍ୟକ୍ତିଙ୍କୁ ୨୦୨୦ ଏପ୍ରିଲ ୨୮ ତାରିଖରେ ନୃସିଂହନାଥ ମନ୍ଦିରରେ ଦ୍ୱିତୀୟ ବିବାହ କରିଥିବା ଅଭିଯୋଗରେ ପିତବାସ ଦର୍ଶାଇଛନ୍ତି । ତାଙ୍କ ସହ ବିବାହ ବିଚ୍ଛେଦ ହୋଇ ନଥିବାବେଳେ ଏହା ବିବାହ ହୋଇଛି । ତେଣୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ପିତବାସ ଅଭିଯୋଗରେ ଉଲ୍ଲେଖ କରିଛନ୍ତି । ପାଟଣାଗଡ ପୁଲିସ ଘଟଣାର ତଦନ୍ତ କରୁଥିବା ଜଣାପଡିଛି ।
Comments are closed.