ବୌଦ୍ଧ: ବୌଦ୍ଧ ବନ ବିଭାଗର ଏକ ବଡ ଅବହେଳା ପଦାରେ ପଡ଼ିଛି । ଦୁଇଦିନ ପୂର୍ବରୁ ଗତ ସୋମବାର ଦିନ ପୁଲିସର ସ୍ୱତନ୍ତ୍ର ଟାସ୍କଫାର୍ସ ବୌଦ୍ଧ ଜିଲା ସାମ୍ପୋଚ ପଞ୍ଚାୟତର ଜଗନ୍ନାଥ ସଡକର ବଘାରପାଲି ଛକରୁ ଗୋଟିଏ ଜୀବନ୍ତ ବଜ୍ରକାପ୍ତା ଉଦ୍ଧାର କରିଥିଲା । ବଜ୍ରକାପ୍ତା ବିକ୍ରି ପାଇଁ ଏକ ଜରି ବ୍ୟାଗ ଭିତରେ ରଖିଥିବା ନେଇ ମଙ୍ଗଳପୁର ଗ୍ରାମର ପ୍ରକାଶ ମହାକୁଡକୁ ଗିରଫ କରି ବୌଦ୍ଧ ବନବିଭାଗକୁ ହସ୍ତାନ୍ତର କରିଥିଲା । ଉଦ୍ଧାର ବଜ୍ରକାପ୍ତାକୁ ମଧ୍ୟ ସ୍ୱତନ୍ତ୍ର ଟାକ୍ସ ଫୋର୍ସ ବନବିଭାଗକୁ ହସ୍ତାନ୍ତର କରିଥିଲା । କିନ୍ତୁ ବୌଦ୍ଧ ବନବିଭାଗର ଅବହେଳା ଯୋଗୁଁ ବଜ୍ରକାପ୍ତାଟି ଖସିଯାଇ ବୁଧବାର ଦିନ ସକାଳୁ ମହାନଦୀ ପଠାରେ ବୁଲୁଥିବାର ସ୍ଥାନୀୟ ଲୋକମାନେ ଦେଖିବାକୁ ପାଇଥିଲେ ।
ଏନେଇ ବନ ବିଭାଗ ପାଖରେ କୌଣସି ସୂଚନା ନଥିବାବେଳେ କିଛି ସ୍ଥାନୀୟ ବାସିନ୍ଦା ଗଣମାଧ୍ୟମ ପ୍ରତିନିଧିଙ୍କୁ ଖବର ଦେଇଥିଲେ । ପରେ ଖବର ପାଇ ବନବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଲୋକଙ୍କ ସହାୟତାରେ ବଜ୍ରକାପ୍ତାକୁ ଧରିବାରେ ସକ୍ଷମ ହୋଇଥିଲେ । ଘଟଣାକୁ ବିଭାଗୀୟ ଅଧିକାରୀମାନେ ରଫାଦଫା କରିଦେବାକୁ ଉଦ୍ୟମ କରୁଥିବା ଶୁଣାଯାଉଛି । ଯଦି ଟାସ୍କଫୋର୍ସ ଦ୍ୱାରା ହସ୍ତାନ୍ତର ହୋଇ ବନ ବିଭାଗର ହେପାଜତରେ ଥିବା ବଜ୍ରକାପ୍ତା ଖସିଯାଇ ପରଦିନ ମହାନଦୀ ପଠାରେ ବୁଲୁଛି ତେବେ ଜିଲାର ଜଙ୍ଗଲ ସଂପଦ ଓ ବନ୍ୟଜନ୍ତୁ କେତେ ସୁରକ୍ଷିତ ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହେବା ସ୍ୱାଭାବିକ ।
